Parlament depýtattary, Qazaqstan halqy Assambleıasynyń (QHA), Joǵarǵy sottyń, memlekettik organdardyń jáne sarapshylar qaýymdastyqtarynyń ókilderi medıasııa ınstıtýtynyń jaı-kúni jáne ony damytýdyń keleshegi, sondaı-aq osy saladaǵy zańnamany jetildirý jónindegi aýqymdy máselelerdi qarady.
Senat komıtetiniń tóraǵasy Georgıı Kım sharany asha kelip, daýlardy medıatordyń qatysýymen retteýdiń quqyqtyq negizi 2011 jyly «Medıasııa týraly» zańmen jasalǵanyn jáne medıasııa áleýmettik-quqyqtyq ınstıtýt retinde qalyptasqanyn atap ótti.
Sonymen birge senatordyń pikirinshe, qoldanystaǵy zańda birqatar olqylyqtar da bar. Atap aıtqanda, qujatta medıasııa rásimderi ústirt túsindiriledi, kásibı jáne kásibı emes medıatorlardyń bilimi men biliktiligine naqty talaptar belgilenbegen. Álemdik tájirıbe de, Qazaqstannyń erekshelikteri de zańda tolyqtaı eskerilmegen.
G. Kım shetel tájirıbesinen mysaldar keltire otyryp, medıasııa ınstıtýty tabysty jumys istep kele jaqtan elderde daýlardyń 80 paıyzy sottan tys qaralatynyn atap ótti. Al bizdiń elimizde onyń artyqshylyqtarynan jurtshylyqtyń beıhabarlyǵynan keńinen qanat jaıa almaı otyr. Senatordyń aıtýynsha, medıasııa barysynda qol jetken kelisimderde ár taraptyń múddeleri qorǵalatyny ári daýlasýshy taraptardy bitistirýge yqpal etetini, al sot sheshimi tek bir tarapty ǵana qoldaıtyny, onyń ózinde tolyqtaı qanaǵattandyrmaıtyny týraly qazaqstandyqtardyń habary az.
QHA Tóraǵasynyń orynbasary Darhan Myńbaı qoǵamdyq medıatorlar ınstıtýtyn qalyptastyrý jáne áleýmettik daýlardy retteýdiń aldyn alý quraly retinde kásibı medıasııany damytýdaǵy Assambleıanyń tájirıbesimen bólisti. «Assambleıa medıasııasynyń jalpy respýblıkalyq ınklıýzıvtik jelisi damyp keledi. QHA Medıasııa keńesi quryldy, Dostyq úılerinde 16 medıasııa bólmesi ashyldy, oblystarda medıasııanyń 13 keńesi jumys isteıdi, aýdan, selo jáne aýyl deńgeıindegi qoǵamdyq kelisim bólmeleriniń sany 1019-ǵa jetti», - dedi D. Myńbaı.
Eńbek jáne halyqty áleýmettik qorǵaý mınıstriniń orynbasary Svetlana Jaqypova óz sózinde áleýmettik-eńbek daýlaryn sheshýdegi medıasııa róline toqtaldy. Onyń aıtýynsha, qazirgi kezde salystyrmaly túrde qaraǵanda kásibı medıatorlardyń aralasýymen qaralǵan isterde eńbek daýlarynyń úlesi óte az. Mınıstrdiń orynbasary eńbek daýlary boıynsha tek Elordada ǵana medıatorlarǵa nazar aýdarylatyny týraly aıtty. Basqa aımaqtarda medıatorlar kómegine sırek júginedi.
Joǵarǵy sottyń sýdıasy Nurııa Sısenova, IIM tergeý departamentiniń bastyǵy Muharan Ámirov, Respýblıkalyq advokattar alqasynyń atqarýshy dırektory Sergeı Sızınsev, Pavlodar qalasyndaǵy «MIR» medıasııa ortalyǵynyń dırektory Saltanat Qaıdarova, «Kelisý» kásibı medıatorlary odaǵynyń» dırektory Sara Ydyrysova sóz sóıledi.
Dóńgelek ústeldiń qorytyndysy boıynsha usynystar ázirlenip, múddeli organdarǵa jiberiletin boldy jáne zań shyǵarý jumystary barysynda eskeriledi.
