Osyndaı qujat blankisi alashordalyqtarda da bolǵan. Iаǵnı 1917 jyldyń aıaǵynda qurylyp,1918 jyldyń ortasynan bastap resmı iske kirisken Alashorda ult keńesi (úkimeti), 1920 jyly 9 naýryzda Kazrevkom «Alashorda» býrjýazııalyq úkimetin joıý týraly buıryq shyǵarǵanǵa deıin blank qoldanyp, is-qyzmetin júrgizgen.
Resmı blankiniń basyna, ıaǵnı qujat ıesi retinde at-ataýy qoıylatyn orynǵa Alashorda ult keńesi óziniń tıtýlyn áýeli arab álipbıi negizinde qazaqshalap «Qazaq-qyrǵyz húkmeti Alash – Orda» dep jazsa, oryssha krıllısamen «Vsekırgızskiı narodnyı sovet Alash – Orda» dep tańbalaǵan. Resmı tıtýldyń astynda qujattyń joldanǵan ýaqyty men nómiri tur.
Osyndaı resmı blankige jazylǵan is-qaǵaz qujattarynyń deni Semeı qalasyndaǵy Qazirgi zaman tarıhyn qujattandyrý ortalyǵynda saqtaýly. Atalmysh mekemeniń ǵylymı-anyqtamalyq jáne qujattardy paıdalaný bóliminiń basshysy Laýra Qadyrovanyń málimetine qaraǵanda, qordaǵy qujattar: Alashorda úkimetiniń, Semeı oblystyq jáne ýezdik Alashorda komıtetiniń jáne Alash qaıratkerleriniń qyzmetine qatysty eken. Sonymen qatar blankige jazylǵan is-qaǵazdar Búkilreseılik ýaqytsha úkimeti Semeı oblystyq jáne ýezdik basqarmalaryna, Semeı gýbernııalyq soty, tóńkeris komıteti, Alash qalalyq qoǵamdyq basqarmasy, Alash jumysshy, sharýa jáne qyrǵyz depýtattary keńesi qatarly uıymdarǵa joldanyp, alash qaıratkerleri – Á.Bókeıhanov, H.Ǵabbasov, R.Mársekov, B.Sársenov, A.Qozybaǵarov, M.Boshtaevtardyń qoltańbasy qoıylǵan deıdi.
Bul blankidegi ekinshi bir erekshe dúnıe – qujattyń meken-jaıy «Semeı oblysy Alash qalasy» (g. Alash. Semıpalat. obl.) dep kórsetilýi. Iаǵnı, qalanyń qazirgi Jańa Semeı dep atalatyn bóligi 1917 jyldan bastap, 1927 jylǵa deıin «Alash qalasy» dep atalǵanyna naqty dálel osy qujat.
Sýrettegi blankiden alashordalyqtardyń ýezdik jer basqarmasyna jazǵan hatyn oqýǵa bolady. Ýaqyty «5-shi qazan 1918 jyl» delingen. Qujat nómiri – 199. Bul hat jazylǵan mólsherde Alashorda úkimetiniń resmı iske kiriskenine tórt-bes aı ǵana bolǵan kez. Sonyń ózinde qujat sany 200-ge ıek artqan eken.
Beken QAIRATULY,
«Egemen Qazaqstan»
