Basqosýdaǵy negizi áńgime «Latyn grafıkasy – latyn álipbıine kóshýdiń máseleleri men bolashaǵy» taqyryby tóńireginde órbidi. Sóz alǵan árbir sheshen ana tili qaı kezeńde de ulttyq qundylyqtardyń bastaýy bolyp tabylatyny, sondyqtan memlekettik tildiń damý máselesine kóp jyldar boıy elimizde erekshe nazar aýdarylyp otyrǵany, sonyń biri – qazaq tiliniń latyn grafıkasyna kóshý máselesi ekenin erekshe atap ótti.
Pikirtalasqa belsendi túrde qatysqan Almaty kommýnısteri de latyn álipbıine aýysý – ýaqyt talaby ekenin, bul jahandaný jaǵdaıynda ózindik erekshelikti saqtap qalýǵa kómektesedi ári Prezıdent latyn álipbıine kóshý týraly tilge tıek etkende, «bul ult bolyp sheshýdi talap etetin prınsıpshil másele ekendigin atap ótti» dep, latyn álipbıine kóshý úderisi qazaq tiliniń jańǵyrýyna jaǵdaı jasaýy tıis degen baılam jasady.
Dóńgelek ústel basynda tebirene sóz sóılegen fılologııa ǵylymdarynyń doktory Temirhan Tebegenovtiń «Latyn grafıkasy – rýhanı jańǵyrýdyń jáne ulttyq biregeılikti nyǵaıtýdyń qýatty faktory, memlekettik tildi jańǵyrtý qajettiligi ony baılanys quraly retinde ǵana paıdalanbaı, tildiń barlyq baı áleýetin ashýǵa septigin tıgizetini» týraly baıandamasy tyńdaýshylaryn tushyndyrdy. Ahmet Baıtursynov atyndaǵy Til bilim ınstıtýtynyń ókili, ǵalym Názıra Ámirjanovanyń sózinen tyńdaýshylar kókeıinde júrgen túrli saýaldarǵa naqty jaýap tapqandaı boldy.
Alqaly jıynda Elbasynyń – Qazaqstannyń Tuńǵysh Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» maqalasyna elimizdiń bolashaqty meńzegen baǵdarlamasy retinde qoldaý bildirip, jańa model elimizdiń gúldenýiniń irgetasy bolady degen tujyrym jasady.
Talǵat SÚIINBAI,
«Egemen Qazaqstan»
ALMATY
