Áýlıeata óńirinde búginde sıfrly tehnologııany qoldaný arqyly jańa ındýstrııalardy órkendetýge kóńil bólinip keledi. Kóne Taraz shaharyn Joldaýda aıtylǵan mindetter arqyly odan ári damytý jáne óńirde sıfrly tehnologııany engizý jumystary qolǵa alyndy. Bul óz kezeginde ekonomıkanyń jedel damýyna da oń serpin beretini anyq. Sonymen qatar nátıjeli isterdiń biri – bolashaqta qala kóshelerinde elektrli avtobýstar da júre bastaıtyn bolady. Bul bir jaǵynan, ekonomıkanyń damýyna qolaıly jaǵdaı týǵyzatyn bolsa, ekinshi jaǵynan, ekologııalyq turǵyda da tıimdi bolmaq.
Jýyrda Jambyl oblysynyń ákimi Kárim Kókirekbaev Qytaı Halyq Respýblıkasyna jumys saparymen baryp, Sýchjoý qalasynda ornalasqan «Higer Quazar» óndiristik kesheninde bolyp, osy keshenniń jumysymen tanysqan bolatyn. Ákim atalǵan kompanııanyń atqarýshy dırektory Hýan Shýn Kın jáne «Higer Quazar» óndiristik kesheniniń ókilderimen kezdesip, «Jasyl ekonomıka» baǵdarlamasy aıasynda ekologııalyq turǵydan zııan keltirmeıtin qoǵamdyq kóliktiń tıimdiligin talqylaǵan edi. Sondaı-aq munda qalaaralyq jáne qalaishilik qoǵamdyq kólikterdi satyp alý, «Quazar» atty elektrli avtobýstar qurastyratyn zaýyt qurylysyn Taraz qalasynda bastaý jaıy da qaraldy.
Bolashaqta bul bastama óńir áleýetin arttyrýǵa da úlken úles qospaq. Eske sala ketsek, qos tarap jylyna 300 elektrli avtobýs shyǵaratyn zaýyttyń qurylysyn «Taraz» ındýstrııalyq parki aýmaǵynda salý týraly memorandýmǵa qol qoıǵan bolatyn. Jobanyń quny 3 mıllıard teńgeni quraıdy. Taraptar arasyndaǵy yntymaqtastyqtyń maqsaty ınvestısııalyq jobany iske asyrý bolyp tabylady. Aıta keterligi, bıylǵy jyldyń basynda Almaty qalasynda «Higer Quazar» ekologııalyq taza elektrli avtobýstar shyǵaratyn zaýyt paıdalanýǵa berilgen bolatyn. Atalǵan kompanııa eki túrli elektrli avtobýstardy qurastyrady. Al bıyl Astana qalasynda ótken EKSPO-2017 halyqaralyq mamandandyrylǵan kórmesi kezinde «Higer Quazar» qazaqstandyq elektrobýs alǵash ret qala kóshelerimen júrgen bolatyn.
Búgingi tańda Taraz qalasynda ekologııalyq taza qoǵamdyq kólikti iske qosý, sondaı-aq qazaqstandyq qondyrǵylardyń elektromobılderine arnalǵan akkýmýlıatorlyq batareıalar óndirisin ashý josparlanyp otyr. «Bul bastama biz úshin ekologııalyq ta, ekonomıkalyq ta jaǵynan tıimdi. Jańa úlgidegi avtobýstar aýany lastamaıdy jáne dybysy da qatty shyqpaıdy. Munyń taǵy bir tıimdiligi – batareıa arqyly júretin avtobýstardyń jeti-aq mınýtta qýatyn tolyqtyrýǵa bolady eken.
Bul aldaǵy ýaqyttarda úlken bir ıgilikti is bolaıyn dep tur», deıdi Taraz qalasynyń ákimi Rústem Dáýlet.
Joldaýda jańa ındýstrııalar qalyptastyrýdyń mańyzdy sharty ınnovasııany qoldaý jáne olardy óndiriske tezirek engizý bolyp sanalatyndyǵy aıtylǵan edi. Bolashaqta Taraz kóshelerinde elektrli avtobýstar júrip, jolaýshylar tasymalyn odan ári damytýǵa septigin tıgizse, bul da jahandyq básekege qabilettiliktiń bir kórinisi bolmaq. Al jahandyq básekege qabilettilik óz kezeginde memlekettiń de, ulttyń da alǵa qoıǵan maqsatyn aıqyndaıdy.
Hamıt ESAMAN,
«Egemen Qazaqstan»
Jambyl oblysy
