...suraý salady
Igi isti nege qoldamaımyz?
Byltyr Baıǵanın aýdany jerlerindegi qaraýsyz qalǵan uńǵylardy ashqan bireýler munaı alamyz dep júrip, qubyrlardy jaryp alǵany týraly jazǵanmyn. Komıssııa qurylyp, apattyń saldaryn joıdyq dep esep bergenmen, uńǵydan aqqan munaımen lastanǵan 8 myń sharshy metr jer sol kúıi jatyr edi. Aýyldyń belsendi turǵyndary dabyl kóterip, shý shyǵaryp ol týraly búkil quzyrly organdarǵa ashyq hat jazdy. Biraq olardan kóremiz, sheshemiz degen jaýaptan basqa esh kómek bolmady. Biraz buryn ekologııalyq alıans qurylyp, sonyń Astanadaǵy bas qosý jıylysyna barǵan Janbolat Jubanov esimdi azamat osy máseleni sol jerde taǵy kóteredi. Jaqynda Janbolatqa Almatydan bir kásipker habarlasyp, las jerdi tegin zalalsyzdandyryp beremin degendi aıtypty. Biraq onyń bul ıgi isin qoldar oblystan adam tabylmaı otyrǵanyn estigende, ne derimdi bilmedim. Bireý kelip, ekologııańdy jaqsartyp beremiz deıdi. Oǵan bir tıyn aqsha suramaıdy. О́z qarjysyna jasamaqshy. Onda nege ol kásipkerdi qýana qarsy almaımyz? Nege teris qaraımyz?
Baqyt JANShAEVA
Aqtóbe oblysy
...rızashylyq bildiredi
Teatr tarlandaryna qurmetim zor
Bul kúnderi shırek ǵasyrlyq toıyn ótkergen Q.Qýanyshbaev atyndaǵy Memlekettik akademııalyq qazaq mýzykalyq drama teatrynda eńbek etken teatr tarlandarynyń eńbegin qurmetteı otyryp, solardan orny bólek eki azamatqa toqtala ketsem deımin.
Alǵashqysy – jazýshy-dramatýrg Rahymjan Otarbaevyń «Ámire» dramasyn qoıýshy rejısser Nurlan Jumanııazov. Ol 1986 jyly stýdent kezinde-aq Shymkent oblystyq drama teatrynda D.Isabekovtiń «Tynyshtyq kúzetshisi» spektaklin qoıyp kórermen alǵysyn aldy. 2002 jyly J.Molerdiń «Skapenniń aılasy» spektaklindegi «Eń úzdik er adam beınesi» atalymyn ıelense, Halyqaralyq teatrlar festıvalinde «Úzdik rejısser» belgisin jeńip aldy. Iаǵnı N. Jumanııazovtyń budan basqa da marapattary barshylyq. Eńbegi baǵalanyp oǵan «Qazaqstannyń eńbek sińirgen qaıratkeri» ataǵy da berildi.
Kelesi – Qazaqstannyń halyq ártisi Talǵat Temenov. Ol kıno jáne teatr rejısseri, kınodramatýrg. Onyń «Adamdar arasyndaǵy bóltirik» atty fılmin erekshe atap ótkim keledi. Bul týyndysy Germanııada ótken kınofestıvalde bas júlde, Italııada kúmis ıelense, Portýgalııada arnaıy júldege ıe boldy. Al «Qazadan keıingi jaza» fılmi arqyly erekshe qoltańbasy bar shynaıy sýretker ekenin dáleldedi.
Eńbegimen qurmetke bólengen osy qos azamattyń jetken jetistikterine rızashylyǵymdy bildire otyryp, aldaǵy ýaqyttarda olardan «Áp, bárekeldi!» degizer tyń týyndylar kútemiz.
Saǵat BAQYRShYQOVA,
zeınetker ustaz
Astana
...áserimen bólisedi
Dindegi alaýyzdyq
Osyndaı taqyrypta Mańǵystaý aýdanyna qarasty Jyńǵyldy aýylyndaǵy «Ulan» balabaqshasynda Mańǵystaý aýdany ákimdigi janyndaǵy dinı aqparattyq túsindirý tobynyń jıyny ótkizilgen bolatyn. Jıynǵa aýdandyq jastar resýrstyq ortalyǵynyń basshysy A.Qonarbaev, ıslamtanýshy teolog E.Aınaqulov, Mańǵystaý oblystyq din ister basqarmasynyń din taldaý ortalyǵynyń aýdandaǵy ókili A.Basbekov jáne balabaqsha ujymynyń músheleri qatynasty.
Búgingi tańda ózekti máselege aınalǵan din problemasy barsha álemdi alańdatyp otyr. Islam dininiń ózi kóptegen topqa bólinip otyr. Salafızm, quranshylar, zikirshiler dep san saqqa bólinip keledi. Dindegi alaýyzdyq degenimiz bul qazirgi tańda túrli sektalar men uıymdardyń nemese jalǵan ustazdardyń shamadan tys kóbeıýinen paıda bolatyn dúnıelerdi aıtýǵa bolady.
Jıynda balabaqsha qyzmetkerleri aýdannan kelgen din salasynyń ókilderine ózderin mazalaǵan saýaldaryn qoıyp, ásirese aýyl turǵyndary tarapynan hıdjab týrasynda, namaz oqýdyń paıdasy sııaqty saýaldaryna naqty jaýaptaryn aldy.
Aldash ShOŃAI
Mańǵystaý oblysy
...batasyn beredi
Kásipkerlerge el razy
Kásipkerler qajetti mamandardy jumysqa tartý úshin Qaraǵandydaǵy kolledjge oqý quraldaryn satyp áperip, aldyńǵy qatarly tehnıkalar zerthanasyn jabdyqtaǵan bolatyn. Shaǵyn jáne orta bızneste baılanys salasynyń mamandary jetispeıdi. Kásipkerler ındýstrııalyq-tehnologııalyq kolledjdi óz qamqorlyqtaryna alyp, qajetti qural-jabdyqtarmen qamtamasyz etýde. Kolledjde quramyna birneshe kásipker kiretin qamqorshylyq keńes qurylyp, kelisimshart aıasynda oqý prosesinde stýdentterdi qajetti barlyq quraldarmen jabdyqtaýda. О́ńirlik kásipkerler kolledjdiń zerthanasyn 4 mıllıon teńgelik jabdyqtarmen qamtamasyz etti. Oqý ornynda «Elektr baılanysy syzyqtyq qurylǵylaryn jáne symdy habar taratýdy eksplýatasııalaý» mamandyǵy boıynsha dýaldy oqytýdy engizý is-sharasyn júzege asyrý maqsatynda tórt fırmamen tórttarapty kelisimshart jasaldy. Qazir stýdentter oqýǵa arnalǵan barlyq qajetti quraldarmen jabdyqtaldy. Bul kómek olardyń oqýǵa degen yntasyn arttyrdy.
Irına KISILEVA
Qaraǵandy oblysy
...alǵys aıtady
Aǵaıyndarǵa rızamyz!
Elimizdiń bas basylymy «Egemen Qazaqstan» gazetindegi «Rysquldyń qabiri Talas topyraǵynda ma?» atty jýrnalıst Hamıt Esamannyń maqalasyn oqyp, Rysquldyń qabirine kóp jyldan beri qamqorlyq jasap kele jatqan Talas aýdany jurtshylyǵyn, onyń ishinde Oıyq aýyl okrýgi turǵyndarynyń ımandy, ónegeli isterin atap ótken maqala avtoryna alǵysymyzdy bildiremiz.
T.Rysqulovtyń 100 jyldyǵyna oraı 1995 jyly Jambyl oblysy, Talas aýdany jurtshylyǵy, aýdan jáne Oıyq aýyl ákiminiń basshylyǵymen Rysqul qabirine temir sharbaq ornatylyp, aty-jóni jazylyp, qulyptas qoıylǵan.
Ońtústik Qazaqstan oblysy, Túlkibas aýdany jurtshylyǵy 2015 jyly Ryskuldyń qabir basyndaǵy qulyptasty jańǵyrtý maqsatynda, budan 20 jyl buryn qoıylǵan qabirden qulyptasy alynyp, ony Túlkibas aýdanyndaǵy T.Rysqulov atyndaǵy murajaıǵa kıeli belgitas retinde saqtaýǵa qoıyldy. Túlkibas aýdanynda jasalǵan mármár tas betine Rysqul beınesi bederlendirilip ornatyldy, qabir keń kólemdegi temir sharbaqpen qorshalyp, aınalasy abattandyryldy.
О́mirtaı QALYQULOV,
sot júıesiniń ardageri
Ońtústik Qazaqstan oblysy,
Túlkibas aýdany
