Qarapaıym kólik jóndeýshiden bastap jetekshige deıingi kadr daıyndaý júıesin jetildirý baǵytynda Atyraýda birqatar sharalar júzege asýda. «Atyraý-Smart» mekemesi qoǵamdyq kóliktegi qyzmetkerlerdiń biryńǵaı málimetter bazasyn jasaqtap, mamandardy daıyndaý men qaıta daıarlaý jumysyn uıymdastyrýdy qolǵa aldy. Taǵy bir jańalyq – munaıly óńirde «Qoǵamdyq kólikti damytý-2020» baǵdarlamasy jasaldy. Sala mamandary men ǵalymdardyń qatysýymen daıyndalǵan baǵdarlama tujyrymdamasy munaıly aımaqtaǵy kólik qatynasyn retteýge baǵyttalǵan.
Qazir oblys ortalyǵynda 24 qoldanystaǵy marshrýt bar. Onyń 12-si qala mańyndaǵy aýyldardan kúnine 84 myńǵa jýyq jolaýshy tasymaldaıdy. Avtobýstardyń bári derlik eskirgen. «Osy qarqynda kete berse, endi bir bes jylda avtobýstardyń qoldanystan shyǵyp qalýy ábden múmkin, – deıdi L.B.Goncharov atyndaǵy qazaq kólik akademııasynyń professory, tehnıka ǵylymdarynyń doktory Jumajan Jańbyrov. – Qazirdiń ózinde halyq taksı qyzmetine kóbirek júginedi».
Ǵalym Atyraý qalasynyń mańynan salynatyn kólik-logıstıkalyq ortalyq kóptegen kúrmeýli máselelerdiń sheshimin tabady degen úmitte. Damý tujyrymdamasyna sáıkes, qalaǵa áli de 345 avtobýs kerek. Al jańa avtobýstar alyp, materıaldyq-tehnıkalyq bazany jańartyp, ınfraqurylym men jol qurylysyn júrgizý úshin 12 mıllıard teńge qajet.
Atyraý qalasy ákiminiń orynbasary Meıirim Qalaýıdyń aıtýynsha, kásipkerlerdiń osy salaǵa ınvestısııa quıyp, paıda tabýyna memleket tarapynan kórsetiletin qoldaý kóp. Al jańa tujyrymdama boıynsha avtobýstar «aqyldy» marshrýt kestesi negizinde qozǵalady. Sondaı-aq birneshe baǵytqa jańa marshrýttar qosyp, elektrondy bılet engizý de josparda bar.
Baqytgúl BABASh,
«Egemen Qazaqstan»
ATYRAÝ
