Kúıshi Murat О́skinbaev atyndaǵy Mańǵystaý oblystyq fılarmonııa janynan 1995 jyly qurylǵan orkestr jıyrma jyldan endi asatyn óz tarıhynda kásibı turǵydan jan-jaqty jetilip, repertýaryn molaıta tústi. О́zindik izdenis kókjıegin keńeıtýdi qazaq óneri men mádenıetin jastarǵa nasıhattaý jáne ony ózge elderge tanytý baǵytymen birge alyp keledi. Ýkraına, Reseı, Ázerbaıjanda óner kórsetken ujym el ishindegi aıtýly sharalardan, baıqaýlardan tys qalmaıdy jáne júldesiz de emes.
Búginde repertýarlyq qorjyny 800-den astam shyǵarmamen tolyqqan orkestr quramynda esimi elge tanymal Qazaqstannyń Eńbek sińirgen qaıratkerleri Serjan Shákirat, Roza Aıdarbaeva, Qazaqstannyń Mádenıet qaıratkerleri Nurııash Ospanova, Jolaman Kóshkinov, Qazaqstannyń Mádenıet salasynyń úzdikteri Asqar, Asanáli Kósherovter, Aqmaral Erimbetova, «Qurmet» ordeniniń ıegeri Tamara Asar jáne basqa da tanymal kúıshiler men sańlaq ónerpazdar qyzmet etedi.
Jıyrma jyl ishinde quramy 60 adamǵa artqan aýqymdy óner ujymynyń basty máselesi aspaptar úniniń birkelki bolmaýynda bolyp otyr. Al ol orkestr oryndaýyndaǵy shyǵarmalardyń dybystyq selkeýligine ákelip soqtyryp, ónerpazdardyń shyǵarmashylyq sheberligine, tulǵalyq ımıdjderine nuqsan keltiredi eken.
– Ony boldyrmaý úshin aspaptar bir sheberdiń qolynan shyǵýy jáne dombyra – tenor, bas-dombyra, kontrabas-dombyra, fleıta, goboı, qobyz-prıma, baıan, sherter, vıolonchel, dombyra prıma aspaptary birdeı materıaldan jasalýy tıis. Osy máseleniń sebebinen jáne orkestr quramynyń artýyna baılanysty, orkestrdi jańa mýzykalyq aspaptarmen qamtý qajettigi týyndap otyr, – deıdi Mańǵystaý oblystyq fılarmonııasynyń qyzmetkeri, ánshi Kúlásh Dosmuhambetova.
«Usta pyshaqqa, etikshi bizge jarymaıdy» degendeı, ult ónerin nasıhattap júrgen óner ujymynyń qalaýy da ónerge, aspapqa qatysty bolyp shyqty. Demek óner óz deńgeıinde óristeýi úshin aspapqa qatysty kem-ketiktiń bolmaýy qajet-aq.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
