Tolıattıde Altynshy Halyqaralyq sporttyq kıno jáne televızııa festıvaliniń jeńimpazdaryn marapattaý saltanaty ótti. Baıqaýǵa kelip túsken barlyq 180 ótinimniń ishinen qorytyndy tizimge 27 fılm endi. Festıval qatysýshylary men qazylar alqasy bir kún boıy televızııalyq fılmder men habarlardy kórip, talqyǵa saldy.
Jambyl oblysy Taraz qalasynan qatysqan qazaqstandyq jýrnalıst, «Jambylsport» telebaǵdarlamasynyń avtory Naıymbek Baǵbanov «Eń úzdik telebaǵdarlama» atalymynda osy bedeldi festıvaldiń jeńimpazy atandy. «EuroChem Cup 2017» halyqaralyq jarysynyń chempıony atanǵan «Almaty-2005» balalar hokkeı komandasy týraly onyń derekti fılmi qazylar alqasynyń joǵary baǵasyna ıe boldy.
Esterińizge salsaq, EýroHım mıneraldy-hımııalyq kompanııasynyń «EuroChem Cup 2017» júldesi úshin uıymdastyrylǵan Altynshy Halyqaralyq balalar hokkeı jarysy 2017 jyldyń 24-27 mamyr kúnderi Novomoskovsk qalasynyń «Iýbıleınyı» sport saraıynyń (RF Týl oblysy) muz alańynda ótken bolatyn. Dodaǵa Reseı, Qazaqstan, Fınlıandııa, Lıtva, Germanııa, Belgııa, Shveısarııa jáne Estonııa syndy 8 eldiń 12 komandasy qatysty.
«Almatydan kelgen jas hokkeıshiler bıyl «EuroChem Cup» jarysynda óte myqty ári qyzyqty oıyn kórsetti. Olar Germanııa jáne Lıtva, sondaı-aq, Kovdor, Novomoskovsk jáne Salavat atynan qatysqan reseılik komandalardy jeńip shyqty. Komandanyń oıyny toǵyz dúrkin álem chempıony Vladımır Petrovtyń joǵary baǵasyna bólendi. Almatylyq balalar hokkeıi týraly sıýjet úshin Vladımır Petrov ómirindegi sońǵy suxbatyn berdi», - dep atap ótti «EýroHım» mıneraldy-hımııalyq kompanııasynyń qoǵamdyq baılanys jáne kommýnıkasııalar departamentiniń dırektory Vladımır Torın. Sondaı-aq, ol «EýroHım» kompanııasy qyzmet jasap jatqan shaǵyn qalalardaǵy áleýmettik baǵdarlamalardy, sonyń ishinde hokkeı sportyn qoldaý úshin jyl saıyn 18 mln. AQSh dollary bólinip otyratynyn atap ótti. «Biz Jańatas jáne Qarataý qalalarynda da aýqymdy sport baǵdarlamalardy damytatyn bolamyz. Kelesi jyly biz Qazaqstannyń osy qalalarynan jas jigitterdi halyqaralyq jarysymyzda kútemiz», - dep qosty Vladımır Torın.
