Jyl: 2017
El: Reseı
Rejısser: Alekseı Ýchıtel
Basty rólderde: Mıhalına Olshanska, Lars Aıdınger, Lýıza Volfram, Danıla Kozlovskıı, Ingeborga Dapkýnaıte, Sergeı Garmash, Evgenıı Mıronov, Grıgorıı Dobrygın, Galına Tıýnına, Vıtalıı Kovalenko
Janr: Drama, Trıller, Tarıhı
Bıýdjet: $25 000 000
Álemdik premera: 8 qazan 2017
Qazaqstandaǵy premera: 26 qazan 2017
Jas shekteýi: E16 - On alty jasqa deıingi kórermenderge ata-analarymen birge kórýge usynylatyn fılmder
Uzaqtyǵy: 109 mınýt
Balerına Matılda Kshesınskaıa men ımperator II Nıkolaıdyń arasyndaǵy qarym-qatynasqa qurylǵan kórkem týyndynyń rejısseri Alekseı Ýchıtel. Kartınadaǵy basty róldi polıak aktrısasy Mıhalına Olshanska somdasa, ımperator ekinshi Nıkolaıdy nemis aktery Lars Aıdınger oınap shyqty. Sonymen birge fılmge Ingeborga Dapkýnaıte, Sergeı Garmash, Evgenıı Mıronov, Danıla Kozlovskıı, Grıgorıı Dobrygındermen jáne basqalar tústi. Bir qyzyǵy Lars Aıdınger orys tilin bilmeıtin bolǵandyqtan, Reseıdiń teatr jáne kıno artısi Maksım Matveev dýblıaj jasaǵan.
«Fılm dindarlardyń senimin aıaqasty etti» degen ýájben Gosdýmanyń depýtaty Natalıa Poklonskaıa men birqatar pravoslav qoǵamdyq uıymdary kartınanyń basty qarsylasyna aınaldy. Tipti Poklonskaıa bas prokýratýraǵa shaǵym túsirip, fılm materıaldaryn júıeli saraptamadan ótkizý kerektigin alǵa tartty. Onyń aıtýynsha, fılmdegi obraz áýlıe qataryna kóterilgen Nıkolaıdyń tulǵasyna qaıshy kelip otyr. Osymen birge depýtat kartınany kórmegenin, múldem kórgisi kelmeıtinin aıtqan. Fılm sıýjetine narazylyq tanytqandar fılmniń naryqqa shyǵýyna qarsylyq retinde arnaıy petısııa uıymdastyryp, oǵan 13 myńnan astam adam qol qoıǵan. Atalǵan faktiler boıynsha Reseıdiń bas prokýratýrasy RF Mádenıet mınıstrligi men Sankt-Peterbýrg ýnıversıteti mamandarynan qurylǵan sarapshylar keńesimen birlesip zertteý júrgizdi. Nátıjesinde fılmniń naryqqa shyǵýyna tyıym salýǵa esh negiz joq ekenin habarlady.
Reseılik belgili kınosynshy Anton Dolın rejısser Alekseı Ýchıtel qoǵam talqylaýdan aınalyp ótetin, tyıym salynǵan taqyrypty qozǵady dep esepteıdi.
«1917 jylǵy revolıýsııanyń júz jyldyǵynda bizdiń kınomatograftar balyqtaı únsiz otyr. Qyzyldar men aqtarǵa, Lenın men patshaǵa tıisý arqyly áldekimdi jábirlep alaýdyń qaýipti ekenin barlyǵy sezedi. Hanzada men has sulýdyń mahabbat tarıhy ertegideı atmosferaǵa qurylyp qana qoımaı, teńdessiz kórkem sheshim týdyrǵan. Qaıtalanbas dekorasııasy men operatorlyq jumystyń minsizdiginen basyń aınalady, al kostıýmder óz aldyna bólek áńgime. Fılm emes, mereıtoıǵa tartý etilgen tort syqyldy», deıdi ol.
Fılmniń túsirilim jumystry Marıınskıı teatry men Ekaterınınskıı, Aleksandrovskıı sııaqty iri saraılarda ótti. Kartınaǵa 17 tonnadan astam mata jumsalyp, 5 myńdaı kıim tigilgen. Fılm mýzykasyn Oskar júldesiniń ıegeri amerıkalyq kompozıtor Marko Beltramı jazyp, Marıınskıı teatrynyń sımfonııalyq orkestri oryndap shyqqan.
Aıa О́MIRTAI,
«Egemen Qazaqstan»
