«Nazarbaev ýnıversıteti» DBBU prezıdenti Shıgeo Katsý taldaý men saralaý qabileti zor jáne jeke tulǵa retinde kommýnıkatıvti, zııatkerlik daǵdylarǵa ıe adam qalyptastyrý úshin bilim qundylyqtarynyń basymdyqqa ıe ekenin jetkizdi.
– Bul bilim alýshylar men otbasy tarapynan ózindik bir tártipke baǵdarlanýdy, barlyq máseleni jumyla qarastyrýdy talap etedi. Biz osy qundylyqtar ary qaraı damýy úshin balalarǵa aıryqsha serpin berýimiz kerek. Osyǵan oraı túrli tehnologııalyq-ınnovasııalyq ádistemeler arqyly balalardy shynaıy ómirge daıyndaýymyz, olardyń órkendeýin qamtamasyz etý úshin etıkalyq, rýhanı tárbıe jaǵyna da zer salý kerek. Oqýshylardyń sana-sezimine ǵana yqpal etip qoımaı, júrekterine jol taba bilý kerek, – dedi ol.
Ýnıversıtet basshysynyń aıtýynsha, bilim alýshy jas qoǵamdaǵy óz ornyn taýyp, Qazaqstannyń damýyna súbeli úles qosýy úshin barsha salany qamtyǵan ınnovasııany meńgerýi tıis. О́ıtkeni túrli saladaǵy qyzmet aqyldy mashınalar, ozyq qural-jabdyqtar sııaqty jańa ádis-tásilder men tehnologııany talap etedi. Qazirgi zertteýler adamzatqa tıesili jumystyń jartysyn jaqyn bolashaqta jasandy ıntellekt júıesi oryndaıtynyn boljaıdy. Sh.Katsý keleshekte sıfrlandyrý úderisi ekonomıkadaǵy jańa serpiliske alyp keletinin, onyń jańa múmkindikter men syn-tegeýrinderge toly bolatynyn atap aıtty. Sondaı-aq qazirgi aldyn ala boljana bermes aýqymdy ózgeristerdiń adamzat ómirine yqpal etetindigin, onyń sheshimin tabýda bilim qundylyqtary men ınnovasııanyń mańyzy zor ekenin jetkizdi. «Bilim berý ınstıtýttary qoǵamdaǵy jyldam ózgeristerge den qoıa bilýi tıis. Túlekterge arnaıy suranys bolýy úshin orta bilim oqý oryndarynyń túlekterine deıin ózgeriske ıkemdi bolýy kerek» dedi Sh.Katsý.
Konferensııa jumysy esimderi álemge tanys sıngapýrlyq On Sen Tan, amerıkalyq Pası Salberg, fransııalyq Iýrı Belfalı, kanadalyq Gordon Nıýfeld sııaqty beldi spıkerlerdiń dáristerimen bastalyp, ártúrli formattaǵy prezentasııalar men paneldik pikirtalastarǵa, poster-sessııalarǵa, dóńgelek ústelderge jalǵasty. Sondaı-aq bilim berý resýrstarynyń kórmesi usynyldy. Al «Rýhanı jańǵyrý» baǵdarlamasyna Parlament depýtattarynyń qatysýymen arnaıy bólim uıymdastyryldy.
Dýman ANASh,
«Egemen Qazaqstan»
