Sol kúnnen bastap qoǵam bul máseleni ár qyrynan, ár deńgeıde talqylap keledi. Talqylaý barysynda keıbir pikirlerdi eseptemegende, jalpy halyqtyń latyn álipbıine kóshýge yqylasty ekenin uqtyq. El men ult taǵdyryna, til taǵdyryna alańdaýly azamattardyń kóptigine kóńil marqaıdy. Latyn grafıkasyna kóshý arqyly táýelsizdikti baıandy etýge, órkenıetti elderdiń qataryna qosylýǵa qulyqtylyq rýhanı jańǵyrýǵa qoǵamnyń daıyn ekenin kórsetip berdi.
Árıne, qazaq dalasynda latyn álipbıi buǵan deıin de qoldanylǵan. 1928-40 jyldary paıdalanylǵan bul álipbıdiń ǵumyry qysqa bolǵanyn, sońyra keńes ókimetiniń kúshteý saıasatymen kırıll álipbıine aýysqanymyzdy eldiń kóbi biledi. Táýelsizdiktiń shırek ǵasyrynda jazýdy aýystyrý qajettiligi ábden pisip-jetildi. Ony kóp sozýǵa bolmaıtynyn ýaqyttyń ózi dáleldep otyr. Bul oraıda Elbasy N.Nazarbaevtyń eńbegin erekshe atap ótý qajet. Ol latyn álipbıine kóshý ıdeıasyn ózi bastap «Qazaqstan-2050» Strategııasynda aıtqan bolatyn. Araǵa bes jyl salyp sony oryndaýǵa bel sheshe kirisip otyr. Qazaq jazýyn latyn álipbıine kóshirýdi – Elbasynyń tarıhı sheshimi dep baǵalaımyn. Bul tarıhı sheshim arqyly ǵylym men aqparat, mádenıet salalarynda úlken jetistikter oryn alatynyna senimim mol. Halqymyzdyń alǵyrlyǵy, ǵylym-bilimge qushtarlyǵy latyn álipbıin tezirek ıgerýge de septigin tıgizedi dep oılaımyn.
Serik NEGIMOV,
Qazaqstannyń eńbek sińirgen qaıratkeri, fılologııa ǵylymdarynyń doktory, professor
