Úkimet basshysy kıeli óńirde Elbasynyń «Qazaqstannyń úshinshi jańǵyrýy: jahandyq básekege qabilettilik» Joldaýy men memlekettik baǵdarlamalar mindetteriniń iske asyrylý barysymen, sondaı-aq óńirdiń kólik-logıstıkalyq áleýetin, áleýmettik ınfraqurylymyn damytý jáne bızneske qoldaý kórsetý sharalarymen tanysty.
Premer-Mınıstr aldymen Aqtaý qalasynyń «Shyǵys-1» shaǵyn aýdanynda salynǵan stýdentter jataqhanasymen tanysty. «Jańa serpin» baǵdarlamasy aıasynda 1 313,6 mln teńge qarajatqa salynǵan 500 oryndyq jataqhanada qazirgi tańda 337 adam ornalasqan. Atalmysh baǵdarlama aıasynda jastardy jumysshy mamandyǵyna daıyndap, múmkindiginshe jumysqa ornalastyrý baǵytynda óńirdegi jetekshi kásiporyndarmen arnaıy memorandým jasalǵan. «Aqtaý teńiz porty» arnaıy ekonomıkalyq aımaǵy aýmaǵyndaǵy kásiporyndarmen 19 memorandýmǵa qol qoıylsa, «Ersaı Kontraktor» JShS-ne jyl basynan beri montajdaýshy, dánekerleýshi syndy mamandyqtardy ıelengen 160 jas maman jumysqa ornalasty. Jalpy, «Jańa serpin» baǵdarlamasy boıynsha 700-ge tarta adam jumysqa ornalasyp, «Arselor Mıtall» AQ, «AZPM» JShS, «QazAvtoJol», «Kapremservıs», «Aıkom Ltd» JShS, «Qazaqtelekom» AQ, «Bıkada» JShS sekildi irgeli kásiporyndarǵa dánekerleýshi, býhgalter, júrgizýshi, elektrık, avtokran júrgizýshisi, geodezıst, programmıst syndy mamandyq alǵan 172 adam is-tájirıbeden ótýge jiberildi. Jas mamandardyń turǵyn úı máselesin sheshýge oń yqpal etetin taǵy bir jataqhana jyldyń sońyna deıin Quryq aýylynda paıdalanýǵa beriledi dep kútilýde. Premer-Mınıstr jataqhana tynysymen tanysyp, jumysty jastardyń hal-jaǵdaıyn bildi.
Úkimet basshysy aralaǵan kelesi nysan – «Bıznestiń jol kartasy-2020» baǵdarlamasy aıasynda memlekettiń qoldaýymen turǵyzylǵan «Sofı Med Grýpp» JShS kópbeıindi klınıkasy. Búginde munda kóptegen jalpy jáne bir jaqty beıindi medısınalyq baǵyttar boıynsha qyzmetter kórsetiledi. 2015 jyly óz jumysyn bastaǵan klınıka 2016 jyldan bastap arnaıy dárigerlik kómek jáne joǵary tehnologııalyq dárigerlik qyzmet kórsetýmen aınalysyp keledi. Sondaı-aq Úkimet basshysy «Atameken» UKP óńirlik keńesiniń múshelerimen kezdesý ótkizdi. Onda shara qatysýshylary memleket-jekemenshik áriptestigin damytý, nesıe resýrstarynyń qoljetimdiligin arttyrý, týrıstik salaǵa qoldaý kórsetýdiń memlekettik baǵdarlamasyn ázirleý jáne óńirde aýyl sharýashylyǵyn damytý úshin sýarýǵa arnalǵan sýmen qamtamasyz etý máselelerin talqylady.
О́ńirdiń bıznes qaýymdastyǵy tarapynan О́ńirlik keńestiń tóraǵasy, «Zapkaztranzıt» AQ dırektorlar keńesiniń tóraǵasy Jańabaı Súıindikov, «Qazteńiztransflot» kompanııasynyń bas dırektory Marat Ormanov, Mańǵystaý oblysy Týrızm qaýymdastyǵynyń tóraǵasy, «Kaspıı holdıng» JShS dırektory Vıktor Koh, «Agrorost» fermerler qaýymdastyǵynyń tóraıymy Nursáýle Jıenbaeva, «Zaman jáne K» JShS jáne «Salıýt jáne K» JShS dırektory Hajeden Izmaılov, «Aqtaý halyqaralyq áýejaıy» AQ atqarýshy dırektory Erǵazy Joldasov, «Kezbı» JShS dırektory Bitim Kezbaev, «DeSali design territory studio» JShS jáne «Coffee&People» JShS dırektory Sáýle Salyhova jáne «QazAzot» AQ Shaǵyrly-Shómishti bólimshesiniń dırektory Abzal Meńdibaev sóz sóılep, óz pikir-usynystaryn ortaǵa saldy. Kóterilgen máseleler boıynsha Mádenıet jáne sport mınıstri Arystanbek Muhamedıuly, Investısııalar jáne damý mınıstri Jeńis Qasymbek túsinikteme berip ótti.
Baqytjan Saǵyntaev óz sózinde Úkimet elimizdiń bıznes ahýalyn jaqsartyp, otandyq bıznesti damytý úshin qolaıly jaǵdaılar jasaý jolynda júıeli jumystar júrgizip jatqanyn atap ótti. Búginde bıznesti qaıta retteý boıynsha belsendi sharalar qabyldanýda jáne bızneske ruqsat qujattamasynyń sany shamamen úsh esege qysqartylǵan. Sondaı-aq túrli eseptemeler men málimdemelerdiń, negizsiz salyq tekserýleriniń sanyn qysqartý boıynsha jumystar jalǵastyrylýda. Budan ózge, bıznestiń memlekettik satyp alýlarǵa jáne kvazımemlekettik sektordyń satyp alýlaryna qoljetimdiligin arttyrý boıynsha kólemdi jumystar júrgizilip, elimizdiń árbir júıe quraýshy kásiporny boıynsha jergilikti qamtý kólemin ulǵaıtýdyń maqsatty ındıkatorlaryn belgileý jumystary bastaý alǵan. Al qarjylyq qoldaý kórsetý sharalary boıynsha qazirgi tańda memleket iske asyryp jatqan Nátıjeli jumyspen qamtý jáne jappaı kásipkerlikti damytý baǵdarlamasy aıasynda tıimdi mólsherleme boıynsha 18 mln teńgege deıin shaǵyn nesıeler beriledi.
Premer-Mınıstr óńir jurtshylyǵy men ortalyq memlekettik jáne jergilikti atqarýshy organdar basshylarynyń qatysýymen Mańǵystaý oblysynyń áleýmettik-ekonomıkalyq damýy men memlekettik baǵdarlamalardyń júzege asyrylýy týraly keńeıtilgen keńes ótkizdi.
– Elbasynyń tapsyrmasy boıynsha biz óńirlerdi aralap júrmiz. Jumysymyz osy aptada Almaty qalasynan bastaldy. «EYDU-nyń Eýrazııa aptalyǵy-2017: birge órkendeýge arnalǵan ashyq naryqtar» forýmyna qatysyp, 35 elden kelgen jaýapty mamandar men ǵalymdar bıznes pen saýda alańyn damytýdyń jan-jaqty tetikterin talqyladyq. Memleketimizdiń basty maqsaty – 2050 jyly damyǵan 30 eldiń qatarynda bolý. Ol úshin biz standarttarǵa saı bolýymyz kerek. Bir jyldyń ishinde tek ǵana Eýrazııalyq odaq kólemindegi elderdiń arasynda saýda-sattyq kólemi 30%-ǵa joǵarylady. Búgin tańerteń mańǵystaýlyq kásipkerlermen kezdesip, shoǵyrlanǵan usynys, máselelerdi talqylap, sheshimin tapqandaı boldyq. Kóptegen jaqsy usynystar aıtyldy. Keıbir munaıshylardyń da kásipkerlikke bet buryp, jeke kásibin ashqandary meni qýantady. Men búgin sizderdiń aldaryńyzǵa arnaıy kelip, usynys-pikirlerińizdi tyńdaıyn, kúrmeýli máseleler bolsa, birigip shesheıik dep otyrmyn, – dedi aktıv jıynynda Premer-Mınıstr Baqytjan Saǵyntaev.
Jıynda Mańǵystaý oblysynyń ákimi Eraly Toǵjanov baıandama jasap, óńirdi áleýmettik-ekonomıkalyq damytý sharalary týraly tanystyrdy. 2017 jyldyń qańtar-qyrkúıek aılarynda óńdeý ónerkásibinde óndiris kólemi 4,1%-ǵa ulǵaıyp, 119 mlrd teńgeni quraǵan. Baıandamada aıtylǵandaı, oblystaǵy júk tasymaldarynyń kólemi qańtar-qyrkúıek aralyǵynda 169,7 mln tonnany quraǵan. Bul – 2016 jyldyń osy kezeńimen salystyrǵanda 7,5%-ǵa joǵary kórsetkish. Bıyl Mańǵystaý oblysynyń kásipkerlerine qoldaý kórsetý kartasy aıasynda 450 jańa turaqty jumys ornyn ashýmen, jalpy somasy 71,5 mlrd-tan astam teńgege 7 jobany júzege asyrý kózdelgen. Osy jyldyń basynan beri jalpy somasy 1,2 mlrd teńgege eki joba qolǵa alyndy. «Nurly jol» baǵdarlamasy aıasynda kóliktik ınfraqurylymdy damytý salasynda Quryq portyndaǵy parom kesheniniń qurylysy jalǵastyrylýda. «Shetpe-Jetibaı-Aqtaý», «Beıneý-Aqjigit-О́zbekstan Respýblıkasynyń shekarasy», «Jetibaı-Jańaózen», «Aqtaý-Kuıylys», «Fort-Shevchenko-Aqtaý jolynyń 43-shaqyrymy-Qalamqas» jáne «Fort-Shevchenko-Taýshyq-Shetpe» avtokólik joldaryn rekonstrýksııalaý men jóndeý jumystary júrgizilip jatyr.
Jurtshylyq tarapynan D.Seıbaǵytov iri kólik magıstraldaryn rekonstrýksııalaý barysy týraly, «Kaspıı» tushylandyrý zaýytynyń dırektory V.Mýrashko tushylandyrylǵan sý kólemin arttyrý týraly, Munaıly aýdany qoǵamdyq keńesiniń tóraǵasy T.Ámirov aýyldyq dárigerler ambýlatorııalaryn damytý jaıynda, oblystyq ardagerler keńesiniń tóraǵasy S.Tóletov óńirdegi ekologııalyq ahýal týraly jáne Túpqaraǵan aýdandyq máslıhatynyń hatshysy A.Dosanova úsh aýysymda oqytatyn mektepter týraly oı órbitti.
– Bıylǵy UBT qorytyndysy boıynsha oblys kóleminde Túpqaraǵan aýdany birinshi orynnan kórindi. Aqshuqyr aýylyndaǵy eki mektebimiz de bilim sapasy jaǵynan árdaıym alda. Biz osy satydan túskimiz kelmeıdi. Alaıda eki mektepte de áýel basta eseptelgen qýatynan bilim ordalarynda eki ese bala oqytylyp jatyr. Sondyqtan da jedeldetip jańa mektep qurylysyn bastamasa, úsh aýysymdy oqytýǵa kóship ketýimiz ábden múmkin. 600 oryndyq mekteptiń smetalyq qujattary daıyn. Osy máseleni sheshýge kómektesseńiz dep suraımyn, – dedi A.Dosanova.
Basqosýda kóterilgen máseleler boıynsha Investısııalar jáne damý mınıstri J.Qasymbek, Energetıka vıse-mınıstri M.Myrzaǵalıev, Densaýlyq saqtaý vıse-mınıstri A.Soı, Bilim jáne ǵylym vıse-mınıstri A.Aımaǵambetov jáne Ulttyq ekonomıka vıse-mınıstri S.Jumanǵarın túsindirip ótti.
Premer-Mınıstr oblystyń negizgi kapıtalǵa salynǵan ınvestısııalar men qurylys jumystarynyń kólemi sekildi damý kórsetkishteri boıynsha oń qarqynǵa ıe ekendigin, jastar arasynda jumys oryndaryn ashý jáne saqtaý qajettigin, óńirde halyq sanynyń qarqyndy ósýine baılanysty turǵyn úı men áleýmettik nysandar qurylysyn kóbeıtý qajettigin aıtty.
Aımaqta «Nurly jer» memlekettik baǵdarlamasy júıeli júrgizilip keledi, nátıjesinde turǵyn úıler salynyp, 10-ǵa jýyq mekteptiń qurylysy bastaldy.
Úkimet basshysy «Kaztýrboremont» JShS sehynda bolyp, sondaı-aq Quryq aýylyndaǵy parom kesheniniń jumysymen, keshenniń ekinshi kezeńiniń qurylys barysymen tanysyp, áleýmettik ınfraqurylym nysandary men ónerkásiptik kásiporyndardy aralady. Mańǵystaýda jasalyp jatqan jumystar ólkeniń tynysynyń keńdigin, qadamynyń qaryshtylyǵyn jáne qýattylyǵyn aıqyndaı túsedi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
