(ERG) Eýrazııalyq toptyń quramyna kiretin «Qazhrom» Transulttyq kompanııasy» AQ fılıaly – «Aqsý ferroqorytpa zaýyt» alyp kásiporyndar qatarynda. О́ndiris ornynda 7 myńdaı adam eńbek etedi. Jylyna 1,2 mıllıon tonna ferroqorytpa óndiretin zaýyt bizdiń elimizde ǵana emes, álemdik metallýrgııa naryǵyndaǵy iri kásiporyndardyń biri sanalady.
Jýyrda zaýyttyń №4 balqytý sehynda kúrdeli jóndeýden ótken №47 pesh paıdalanýǵa berildi. Alyp elektr peshiniń kúrdeli jóndeýi zaýyttyń ınvestısııalyq baǵdarlamasy aıasynda júzege asty. Zaýyt dırektory Sergeı Prokopevtiń aıtýynsha, eski peshti jóndeý jumysy qyrkúıek aıynda bastalypty. Peshte joǵary kómirtekti ferrohrom óndiriledi. Mehanıkalyq, gıdravlıkalyq jáne energetıkalyq tehnıkalyq qajettilikteri avtomattandyrý júıesine aýystyrylyp, metallýrgııa salasyndaǵy ozyq qural-jabdyqtar ornatyldy. Qaýipsiz ári ekologııalyq jaǵynan taza. Zamanaýı tehnologııa, jańa peshtiń qosylýy zaýyttyq ónimdiligin, arttyrady. Peshtiń jyldyq ónimdiligi – 27 myń tonna joǵary kómirtekti ferrohrom. Zaman talaptaryna saı jabdyqtaýǵa, jańartýǵa salynǵan ınvestısııa kólemi – 1,4 mlrd teńge.
– Qazirgi kúni júrgizilip jatqan negizgi jáne qosalqy jańǵyrtý jumystary-kásiporynnyń turaqty damýynyń basty faktory. Zaýyttyń barlyq óndiristik nysandary eńbekti qorǵaý, qaýipsizdik pen qorshaǵan ortany qorǵaý salasynda zamanaýı talaptardy esepke ala otyra jobalanyp, jetildirilip otyrady. Bizdiń kompanııada álem naryǵyna shyǵýǵa múmkindik beretin ferroqorytpa óndirýdiń tájirıbesi qolǵa alynýda. Árbir kúrdeli jóndeý – jańa pesh iske qosyldy degen sóz,– deıdi zaýyt dırektory Sergeı Prokopev.
Jóndeýden ótken peshterdiń iske qosylýy – ónimdilikti arttyrýǵa, jumys sapasyn jaqsartýǵa, jumys oryndarynyń ashylýyna úles qosady. Qaı óndiriste bolsyn bul asa mańyzdy. Avtomattandyrý, elektrodtardyń qýattyn tıimdi paıdalaný jáne olardyń tok rejimin turaqtandyrý arqyly energııa únemdeıdi. Balqytýshylardyń eńbek qaýipsizdigin de qamtamasyz etedi.
– Zaýyttyń óz mamandary jasaǵan peshterdiń kúrdeli jóndeý jumystary-bizdiń elimizde álemdik deńgeıde ferroqorytpa óndirisin óndirýdi júzege asyrýdyń taǵy bir kórinisi. Barlyq qurylys-montaj jumystaryn zaýyt mamandary jasady. Bul biz úshin maqtanysh. Kásiporynnyń «Uqypty óndiris» baǵdarlamasynyń júzege asyrylýyna úles qosqan metallýrgterge rızashylyǵymdy bildirgim keledi, – deıdi zaýyt dırektory Sergeı Prokopev.
Farıda BYQAI,
«Egemen Qazaqstan»
Pavlodar oblysy,
Aqsý qalasy
Sýretterdi túsirgen
Irına SYChINA
