Sý qoımasy iske qosylsa, 6 myń gektar sýarmaly jer paıda bolady. О́skemendegi aqparattyq ortalyqta ótken brıfıngte aýdan ákimi Nurlan Sydyqov osylaı dep málim etti. Aýdan basshysynyń aıtýynsha, óndirisi men aýyl sharýashylyǵy qatar órken jaıǵan Jarma aýdany 10 aıdyń kórsetkishi boıynsha oblystaǵy 19 qala men aýdan ishinde 1 oryndy ıelenipti. «Baqyrshyq ken baıytý kombınaty» bıyl aýdan bıýdjetine 50 mıllıard teńge ınvestısııa salypty. «Ken orny bıznestiń áleýmettik jaýapkershiligi aıasynda aýdanǵa kómek qolyn sozyp keledi. Byltyr Áýezov kentindegi «Aqqý» balabaqshasyn 240 mıllıon teńgege kúrdeli jóndeýden ótkizip, el ıgiligine berdi.
Osy rette aıta keter jaqsy jańalyǵymyz, kásiporyn jaqynda osy kenttegi 1973 jyldan beri jóndeý kórmegen mektepti kúrdeli jóndeýden ótkizýge 300 mıllıon teńge kóleminde qarjy bólý jóninde sheshim qabyldady. Bul bilim ordasynda qazir 475 bala oqıdy. Baqyrshyq iske kiriskennen beri aýyldaǵy bala sany da kóbeıip keledi. Buryn Baqyrshyq atalǵan kentke 1967 jyly uly jazýshy Muhtar Áýezovtiń esimi berilgenimen, eldi mekende qalamger atyna birde-bir kóshe berilip, eskertkish qoıylmaǵan eken. Bıyl osy olqylyqtyń orny toltyryp, kenttiń bir kóshesine dara tulǵanyń atyn berip, eńseli eskertkishin ornattyq», - deıdi aýdan ákimi. N.Sydyqov Bóke kenishiniń jumysy da qaıta jandanyp, kóship ketken aýyl turǵyndary qaıta oralyp, burynǵy aýdan ortalyǵy – Shar qalasyna da erekshe kóńil bólinip, shaǵyn shahardy abattandyrýǵa qomaqty qarjy bólingenin atap ótti. Múgedek balalar men halyqqa qyzmet kórsetý ortalyǵy jańa ǵımaratqa kóshirilip, qala ortalyǵynda hákim Abaıǵa keýde músin qoıylǵanyn tilge tıek etti.
«Bıyl Sharda 5 jarym shaqyrym jol asfalttaldy. Bul – qala tarıhynda buryn-sońdy bolmaǵan oqıǵa. Kelesi jyly Shar shaǵyn qalalardy damytý baǵdarlamasyna engiziledi, osy rette tek kóshelerge qatysty 17 joba ázirledik. Atalǵan jobalarymyz osy baǵdarlamaǵa ener bolsa, qalada asfalttalmaǵan kóshe qalmaıdy. Sonymen qatar Sharda sport keshenin salý úshin smetalyq-jobalyq qujattardy ázirlep, saraptamadan ótkizip qoıdyq», - deıdi N.Sydyqov.
Azamat QASYM,
«Egemen Qazaqstan»
Shyǵys Qazaqstan oblysy,
Jarma aýdany
Sýretti túsirgen avtor
