Elbasy 2012 jyly «Qazaqstan-2050» Strategııasynda elimizdiń 2025 jyldan bastap latyn álipbıine kóshýi qajet ekenin aıtqan bolsa, bıyl jaryqqa shyqqan «Bolashaqqa baǵdar: rýhanı jańǵyrý» atty maqalasynda qoǵamdyq sanany jańǵyrtýdyn naqty jobalary qajet ekenin, onyń ishinde búgingi jazýymyzdy birte-birte latynǵa kóshirý máselesin aıtyp ótken bolatyn. Dál sol maqalanyń ózi qoǵamdyq sanany jańǵyrtýǵa lokomotıv bolǵany shyndyq. Ásirese, áńgime latyn álipbıine tirelgen tusta qoǵam qatty belsendilik tanytýda. Túrli jobalardyń usynylýy, túrli deńgeıdegi talqylaýlar sonyń aıǵaǵy.
Dóńgelek ústelde baıandama jasaǵan qoǵam qaıratkeri, saıasattaný ǵylymdarynyń doktory Kamal Burhanov latyn álipbıine kóshýdiń saıası aspektilerine toqtaldy. Elimizdiń aýmaǵynda túrli dáýirde, túrli kezeńderde qoldanylǵan jazýlardyń tarıhyna toqtalyp, jazýdyń ult mádenıetinde alatyn ornynyń ereksheligin basa aıtty. K.Burhanov baıandamasynyń túıini latyn álipbıine kóshýdi saıasılandyryp, onyń astarynan daý-janjal izdemeý kerek degen pikirge saıdy. Ol álemde jazýy birdeı nemese uqsas talaı memleket bar ekenin, biraq, sol jazýdyń birdeıligi nemese uqsastyǵy olardyń bir-birimen tatýlyqta ómir súrýine kepil bola almaıtynyn aıtyp, birqatar memleketterdi mysalǵa keltirdi.
Al, Memleket tarıhy ınstıtýtynyń jetekshi ǵylymı qyzmetkeri Qundyzaı Erimbetova latyn álipbıine kóshý ýaqyt talabyna saı der kezinde kóterilip otyrǵanyn aıtyp, táýelsizdikti alǵan kezde biz latyn álipbıine kóshýge daıyn emes edik degen pikirde oı órbitti. Ol latyn álipbıine kóshý arqyly elimizdiń ashyq demokratııalyq qoǵam qalyptastyratynyn jetkizdi. «Biz latyn álipbıine kóshý arqyly rýhanı qundylyqtarymyzdy qalpyna keltiremiz, álemdik órkenıet kóshine jedel ilesetin bolamyz», dedi ol.
Aıgúl SEIIL,
«Egemen Qazaqstan»
