«Nur Otan» partııasynyń Astana qalasy Esil aýdandyq fılıaly tóraǵasynyń orynbasary Ahmet Seıitov pen fılıal keńesshisi Erlan Ahmedı qatysyp, baıandama jasaǵan sharada Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy latyn álipbıine kóshirý máselesi qamtyldy. Fılıal tóraǵasynyń orynbasary búginge deıin qoǵamdyq sanany jańǵyrtý jónindegi ulttyq komıssııaǵa 300-ge jýyq jobanyń usynylǵanyn aıtty.
Ol latyn grafıkasyn jasaýmen A.Baıtursynov atyndaǵy Til bilimi ınstıtýty men Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy belsendi aınalysyp jatqanyn aıta kelip, bul máselede halyq pikiri de eskerilip jatqanyn basa aıtty. «О́zge elder latyn álipbıine ótkende halyqtyń pikirimen sanasqan joq», dedi ol. A.Seıitov latyn álipbıine kóshý kezeńmen-kezeńmen iske asatynyn, bul turǵyda qoǵamnyń eshqandaı múshesiniń de alańdaýyna negiz joq ekenine toqtaldy.
Al «Nur Otan» partııasy Astana qalasy Esil aýdandyq fılıalynyń keńesshisi Erlan Ahmedı biz latyn álipbıine kóshpeıtinimizdi, oǵan oralatynymyzdy basa aıtty. О́ıtkeni latyn álipbıin qoldaný tájirıbesi qazaq dalasynda bolǵan. Ol sondaı-aq kórshi elderdiń tarıhynan mysaldar keltirdi. Máselen, baýyrlas Túrkııa eli Atatúrik el bılegen tusta 800 jyldyq arab jazýynan úsh aıdyń ishinde bútindeı bas tartyp, latyn grafıkasyna negizdelgen jazýǵa kóshkenin baıandady. Onymen salystyrǵanda jeti-segiz jyldyń ishinde kezeń-kezeńmen latyn álipbıine kóshý asa kóp qıyndyq týdyrmaýy tıis degen pikir aıtty.
Aıgúl SEIIL,
«Egemen Qazaqstan»
