Belgilengen merzimdi ótkergen jáne zapasqa bosatylatyn áskerı qyzmetshiler, áskerı abyroı, ar-namys pen dańqtyń sımvoly – Jaýyngerlik týmen qoshtasty. Saltanatty sap túzeýde bólim komandırleri olarǵa sáttilik, al otbasylaryna beıbit aspan tiledi. Budan keıin qyzmettik jaýyngerlik tapsyrmalardy adal oryndaǵany úshin sarbazdar maqtaý qaǵazdar, alǵys hattar, qyzmet týraly fotoalbomdar jáne estelik syılyqtarmen marapattaldy.
Saltanatty rásimde zapasqa bosatylǵan áskerı qyzmetshiler sońǵy ret ózderiniń bólimderiniń alańqaıynda sap túzep júrip ótti. «Qyzmetimizdi jyly sezimmen jáne jaqsy áserlermen eske alyp otyratyn bolamyz. Biz úshin teńiz jaıaý áskeri týǵan úıimizge aınaldy, teńiz jaıaý áskeriniń jalyny júregimizde ot bolyp laýlap turady. Bizge demeý bolyp, qolǵabys jasaǵan, oqytqan, bul joldan ótýge kómektesken barshalaryńyzǵa alǵys bildiremiz», dedi №25744 áskerı bólimi teńiz jaıaý áskerleriniń sarbazdary atynan sóz sóılegen qatardaǵy jaýynger Erkinbek Ańsar.
Desanttyq-shabýyldaý áskerleriniń jaýyngerleri Vıtalıı Rodıonov, Narıman Dýmanov pen Jánibek Ábildın Qarýly Kúshterdiń QAZBAT bólimshesinde qyzmet etkenderin maqtan tutady. Olardyń aıtýynsha, dál osy jerde, ıaǵnı áskerde eń jaqsy adamı jáne kásibı qasıetterdi boılaryna juqtyrǵan. «Adal qyzmetteriń úshin úlken alǵys bildiremin. Sapta turǵan árqaısylaryń ózderińniń qajyrly eńbekterińmen aǵa býynnyń dástúrin laıyqty túrde jalǵastyra otyryp, Otanǵa degen adaldyqtaryńdy dáleldedińder. О́mirdegi óz joldaryńdy tabýlaryńa tilektespin. Buǵan Desanttyq-shabýyldaý áskerlerinde jınaqtaǵan tájirıbeleriń septigin tıgizerine senimdimin», dedi saltanatty shara barysynda Desanttyq-shabýyldaý áskerleri qolbasshysynyń orynbasary polkovnık Vıktor Jıtnık.
Eske salsaq, 2017 jyly barlyǵy 5 myńǵa jýyq merzimdi áskerı qyzmetshi zapasqa bosatylady.
Qaırat JÚNISULY
