Respýblıkalyq qoǵamdyq keńes otyrysyna Parlament depýtattary, Mádenıet jáne sport mınıstrliginiń, ortalyq memlekettik jáne jergilikti atqarýshy organdardyń qyzmetkerleri, ÚEU basshylary, partııanyń ortalyq apparat pen aımaqtyq fılıaldarynyń, qoǵamdyq keńesterdiń, BAQ-tyń ókilderi qatysty.
Keńeste atalǵan sala boıynsha sybaılas jemqorlyqqa katysty qylmystar sanynyń ósip otyrǵany atap ótildi. Sybaılas jemqorlyqqa qarsy qyzmet osy salada 2015-2016 jyldar men 2017 jyldyń 6 aıynda 175 sybaılas jemqorlyq qylmystary tirkegen, onyń ishinde 2015 jyly – 57, 2016 jyly – 74 jáne 2017 jyldyń 1-shi jartyjyldyǵynda – 44.
Respýblıkalyq keńeste qaraýǵa daıyndaý úshin «Nur Otan» partııasynyń janyndaǵy Sybaılas jemqorlyqqa qarsy is-qımyl jónindegi qoǵamdyq keńes tóraǵasynyń orynbasary Q.Súleımenov basshylyq etken jumys toby qurylyp, onyń quramyna Májilis depýtattary B.Kesebaeva, A.Platonov, «Nur Otan» partııasynyń ortalyq apparatynyń qyzmetkerleri, Mádenıet jáne sport mınıstrliginiń ókilderi engizildi.
Taldaý nátıjesinde mádenıet jáne sport salasynda sybaılas jemqorlyqtyń eleýli qaýpi bar ekendigi, oǵan qarsy mınıstrlik pen jergilikti atqarýshy organdar tarapynan qajetti sharalar bolmaı otyrǵandyǵy anyqtaldy.
Respýblıkalyq qoǵamdyq keńes otyrysynyń qorytyndysy boıynsha ortalyq jáne atqarýshy organdarǵa anyqtalǵan kemshilikterdi joıý boıynsha naqty usynymdar berildi.
«Egemen-aqparat»
