Tuńǵysh ret uıymdastyrylyp otyrǵan sharanyń maqsaty – Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy bastamalardy iske asyrý aıasynda jastarǵa rýhanı tárbıe beretin ıgilikti sharalardy uıymdastyra otyryp, otandyq ǵalymdardyń ulaǵatty isterin óskeleń urpaqqa nasıhattaý.
Hımııa ǵylymdarynyń doktory, professor E. Meńliǵazıevtiń 75 jyldyq, hımııa ǵylymdarynyń doktory, professor B. Jıembaevtyń 70 jyldyq mereıtoıyna oraılastyryp uıymdastyrylǵan alqaly jıynǵa qoǵam qaıratkerleri, elimizdegi ǵylymı mekemelerdiń basshylary, otandyq jáne sheteldik tanymal ǵalym-zertteýshiler qatysty.
Qyzdar ýnıversıtetiniń Jaratylystaný fakýltetiniń dekany Qajymuqan Kishibaev oqý ornynyń rektory Gaýhar Aldambergenovanyń sharaǵa qatysýshylarǵa joldaǵan quttyqtaý hatyn oqydy.
– Qurmetti konferensııaǵa qatysýshylar, elimizdegi pedagog kadrlar daıarlaıtyn irgeli oqý ordasy – Qazaq memlekettik qyzdar pedagogıkalyq ýnıversıtetine qosh keldińizder! Rýhanı jańǵyrý – bul adam sana-seziminiń, senimi men sapasynyń, bilimi men ómir súrý tásiliniń kórsetkishi. Qoǵamdyq sanany jańǵyrtýdyń basty faktory – sapaly bilim, básekege qabilettilik. Osy oraıda qazaqstandyq ǵalymdardyń shyǵarmashylyq, ǵylymı-zertteý jumystaryn nasıhattaý men ony keń kólemde jarııalaýda, jastardy jobalyq zertteý is-áreketterine tartýda jáne bilim berý úrdisiniń tıimdiligin kóterý men qoldanbaly ǵylymǵa degen qyzyǵýshylyqtaryn damytýda osy taqilettes jıyndardyń máni men mańyzy qanshalyqty zor ekendigi aıtpasa da túsinikti. Konferensııa qatysýshylaryna jemisti jumys tileımin, – delingen quttyqtaý hatta.
Konferensııa jumysy 4 seksııa boıynsha júrgizildi. Atap aıtqanda, jıynǵa qatysýshylar «Qazirgi tańdaǵy hımııa jáne hımııalyq tehnologııanyń ózekti máseleleri», «Bıologııa, ósimdikter fızıologııasy, bıotehnologııa jáne ekologııa salalarynyń ınnovasııalyq jetistikteri», «Geografııalyq ǵylym jáne bilim: qazirgi jaǵdaıy, máseleleri jáne bolashaǵy» jáne «Innovasııalyq bilim berý – pedagogıkalyq sheberlikti damytýdyń negizi» baǵyttary boıynsha tyń oılarymen bólisip, paıymdy pikirlerin aıtty. Baıandama jasaǵandar qatarynda «Ǵarysh-Ekologııa» ǵylymı-zertteý ortalyǵynyń bas dırektory, tehnıka ǵylymdarynyń doktory Jaılaýbaı Jubatov, Túrkııanyń Omer Halısdemır ýnıversıtetiniń professory Torǵaı Dýgen, Stambýl ýnıversıtetiniń professory Mehmet Arslan syndy bedeldi ǵalymdar bar.
Sondaı-aq, konferensııa aıasynda qazaqstandyq izdenýshilerdiń ǵylymı eńbekteriniń kórmesi ótkizilip, ǵalymdardyń stýdentterge arnalǵan sheberlik synyptary júrgizildi.
Konferensııaǵa kelip túsken materıaldar negizinde arnaıy jınaq shyǵarý kózdelip otyr. Bul óz kezeginde elimizdegi izdenýshi jastarǵa, ǵylymı jumystarmen aınalysatyn ǵalymdar úshin mańyzdy teorııalyq jáne ádistemelik kómekshi quraly bolmaq.
