Ortalyq ǵylymı kitaphanada uıymdastyrylǵan keleli jıynǵa belgili qoǵam qaıratkerleri, túrkitanýshy-ǵalymdar jáne zııaly qaýym ókilderi qatysty.
Dóńgelek ústeldi júrgizip otyrǵan Akademııa basshysy Darhan Qydyráli sharanyń maqsatyna toqtaldy. Elbasy Nursultan Nazarbaevtyń «Rýhanı jańǵyrý» baǵdarlamasynda kóterilgen aýqymdy máseleler týraly aıta kele, sol mindetterdi júzege asyrý maqsatynda ári baýyrlas elder arasyndaǵy ǵylymı yntymaqtastyqty arttyrý úshin Akademııa tarapynan atqarylǵan is-sharalar retimen de tanystyryp ótti. Sonymen birge, kópshilikke uıymnyń qyzmeti men ǵylymı jobalary jóninde baıandady.
Budan ózge, kezdesýde sóz alǵan Qazaqstan Respýblıkasynyń Ulttyq Ǵylym akademııasynyń prezıdenti Murat Jurynov, Túrki keńesi Aqsaqaldar keńesiniń múshesi Ádil Ahmetov, Qyrǵyzstandaǵy Manas qyrǵyz-túrik ýnıversıtetiniń professory Qadyraly Qońqabaev jáne A.Baıtursynuly atyndaǵy Til bilimi ınstıtýtynyń dırektory Erden Qajybek qundy oılarymen, paıymdy pikirlerimen bólisti.
Shara barysynda tanymal akademıkter, ǵylym maıtalmandary Sh. Sarybaı, Á. Qaıdar jáne R. Syzdyqty Akademııa tarapynan arnaıy marapattaý rásimi de ótti. Sondaı-aq, 2014 jyly Túrki akademııasynyń kitaphanasyna áıgili majar túrkitanýshysy Ishtvan Qońyr Mandokıdiń 16 myńnan astam jeke kitap qory men qundy qoljazbalaryn tapsyrǵan ǵalymnyń jary Ońaısha Maqsumqyzyna syı-sııapat kórsetildi.
Aıta ketý kerek, alqaly shara sheńberinde kópshilikke Akademııanyń ǵylymı jobalary negizinde jaryq kórgen jańa eńbekter tanystyrylyp, kitap kórmesi uıymdastyryldy.
