Alık Shpekbaev arnaıy monıtorıngtik top múshelerimen birge Oral qalasy ákimdiginde bıylǵy maýsym aıynan beri jumys istep turǵan «Ashyq ákimdik» jobasynyń nátıjelerimen tanysty. Turǵyndardyń ákimdik kabınetteri arasynda sabylyp júrmeı, jańasha uıymdastyrylýy – zaman talaby. Oraldyq «Ashyq ákimdik» jobasynyń jumysyn aralap kórgen tóraǵa orynbasary bul bastamany odan ári jaqsartý boıynsha óz usynystaryn aıtty.
Sapar aıasynda A.Shpekbaev oblystyń Terekti, Zelenov jáne Tasqala aýdandarynda kóshpeli kezdesý ótkizip, jumyspen qamtý jáne áleýmettik baǵdarlamalar, halyqqa qyzmet kórsetý, kóshi-qon qyzmeti salalary jáne aýdandyq aýrýhana sekildi halyq pen bızneske qyzmet kórsetetin mekemelerdi ınspeksııalady.
Kezdesý barysynda A.Shpekbaev memleket kórsetetin qyzmet sapasyn arttyrý, memlekettik organdarda azamattarǵa jaǵdaı jasaý úshin jumysty ońtaılandyrý, avtomattandyrý qajettiligin túsindirdi. Aýdan aktıvimen kezdesý barysynda jergilikti ákimderge qaı salada bolmasyn memleketten kórsetiletin qyzmetterdi alý kezinde azamattarǵa qolaıly jaǵdaı jasaýdy tapsyrdy. Memleketten kórsetiletin qyzmetterdi alý kezinde turǵyndardyń zańdy quqyǵy buzylsa, tıisti oryndarǵa shaǵymdanyp, belsendi azamattyq ustanymyn kórsetsin dedi astanalyq ókil.
27 qazanda tóraǵa orynbasarynyń qatysýymen Oral qalasynda sybaılas jemqorlyqqa qarsy «Taza qol: parasyz bolashaqqa birge» atty forým ótti. Bul jıynda da jergilikti kásipkerler arasynan sýyrylyp shyǵyp, óz kásibinde kezdesken zańbuzýshylyqtar men kedergiler týraly memlekettik mekemeler qyzmetine shaǵym aıtqandar boldy. Alık Jatqambaıuly ol máselelerdiń árqaısysy týraly ekinshi jaqtyń kózqarasyn tyńdap, máseleni zerttep, oń sheshilýine kómektesýge ýáde berdi.
28 qazanda A.Shpekbaev Batys Qazaqstan oblysy ákimi janyndaǵy sybaılas jemqorlyqqa qarsy komıssııa otyrysyna qatysty. Bul jıynǵa jergilikti jáne ortalyq memlekettik organdardyń, quqyqqorǵaý júıesiniń basshylary, aýdan ákimderi, aýdandyq máslıhat hatshylary men depýtattar, qoǵamdyq keńesterdiń jáne úkimettik emes uıymdardyń ókilderi shaqyrylǵan. Otyrysta memleket kórsetetin qyzmet sapasy, memlekettik qyzmet salasynda zańnamanyń saqtalýy jáne sybaılas jemqorlyqqa qarsy qoldanylyp jatqan sharalar talqylandy.
Agenttik tóraǵasynyń orynbasary óz sózinde elimizdiń sybaılas jemqorlyqqa qarsy saıasaty túbegeıli ózgergenin aıtyp ótti.
- Júrgizilgen jumys nátıjesinde ákimshilik kedergiler qysqardy, turmystyq jemqorlyq tómendedi, memlekettik organdardyń ashyqtyq jáne esep berý prınsıpteri engizildi. Sondaı-aq, sybaılas jemqorlyqqa qarsy strategııany odan ári tıimdi júzege asyrý úshin baǵdarly zańnamanyń jáne sybaılas jemqorlyqqa qarsy sharalardyń tıimdiligin jetildirý men kóterý qajettiligi baıqalady, - dedi Alık Jatqambaıuly.
Azamattar ádette memlekettik qurylymdarǵa memleketten kórsetiletin qyzmet úshin keledi. Ol qyzmettiń sapaly jáne ýaqytyly, ákimshilik kedergilersiz bolýy – árbir qyzmet kórsetýshiniń mindeti. Biraq, taldaý nátıjeleri bul salada sheshilmegen túıinder bar ekendigin kórsetedi.
BQO boıynsha jalpy kórsetilgen memlekettik qyzmettiń 31%-y ǵana (2,4 mln.) elektrondy túrde kórsetilgen. Memlekettik korporasııa arqyly kórsetilgen memlekettik qyzmet úlesi 2016 jylǵy 2%-dan 46%-ǵa deıin ósipti. Alaıda, memlekettik qyzmettiń basym bóligi áli qaǵaz túrinde júredi.
Batys Qazaqstan oblysynda bıylǵy 9 aı ishinde 304 memlekettik qyzmetshi qyzmetinen aýysqan eken. Bul respýblıkalyq kórsetkishten 1,8%-ǵa joǵary. «Jergilikti atqarýshy organdardaǵy kadrlyq jaǵdaıǵa basa nazar aýdarý kerek» dedi A.Shpekbaev.
Memlekettik qyzmetshi qyzmet ókiletin oryndaý kezinde quny 1 AEK-ten artyq bolatyn syılyqty alýyna bolmaıdy. Iаǵnı aıtqanda, quny 1 AEK-ten artyq syılyq bolsa, ol memlekettik qorǵa tapsyrylýy tıis. Al Memlekettik múlik jáne jekeshelendirý Komıtetiniń 2017 jyldyń 9 aıyndaǵy qorytyndysyna qaraǵanda BQO-da memlekettik qorǵa jalpy somasy 207 125 teńge bolatyn 116 syılyq qana tapsyrylǵan. Sonda BQO memqyzmetshileri syılyq almaı ma, álde alǵan syılyǵyn tapsyrmaı ma? A.Shpekbaev memlekettik mekeme basshylaryna berilgen syılyqtarǵa túgendeý júrgizip, arnaıy qorǵa tapsyrylýyn qadaǵalaý qajettigin atap kórsetti.
Oraldaǵy komıssııa otyrysynda «Sybaılas jemqorlyqqa qarsy Birinshi medıa-ortalyq» respýblıkalyq qoǵamdyq uıymynyń tóraǵasy T.Baıǵulov «Joldarda sybaılas jemqorlyq deńgeıin tómendetý boıynsha 10 qadam» jobasymen tanystyrdy.Shara sońynda, «Jasyryn satyp alý» jobasynyń jumysy qorytyndylanyp, rezonansty sybaılas jemqorlyq isteri boıynsha beınerolıkter kórsetildi.
Qazbek QUTTYMURATULY
Sýretti túsirgen Aıbatyr NURASh
ORAL
