Qostanaı Reseıdiń shekaralas oblystarymen, Tatarstan Respýblıkasymen ekonomıkalyq qarym-qatynas jasaıdy. Ásirese sońǵy jyldary Tatarstanmen barys-kelis jıiledi. Tamyz aıynda Qostanaıǵa Tatarstan prezıdenti Rýstam Mınnıhanov kelip, kásiporyndardy aralap, ekonomıkalyq, mádenı baılanystar ornatýǵa baǵyttalǵan kelisimder jasasqan bolatyn. Bul joly Qostanaı oblysy ákiminiń orynbasary Meıirjan Myrzalıev bastaǵan delegasııa iskerlik qarymta saparmen Tatarstanda bolyp qaıtty.
Tatarstan Reseı aımaqtary arasynda qaı salada bolsyn qarqyndy damýymen erekshelenedi. Sondyqtan qostanaılyq delegasııa tatar aǵaıyndarmen ekonomıkalyq qatynastardy nyǵaıtýǵa qol jetkizýdi maqsat tutty. Sapar barysynda Tatarstannyń premer-mınıstriniń birinshi orynbasary Rýstam Nyǵmatýllınmen kezdesýde oblys ákiminiń orynbasary Meıirjan Myrzalıev halyqaralyq jáne óńiraralyq baılanystardy damytýdyń mańyzyna toqtala kelip, Qostanaı oblysynyń ekonomıkalyq órleý kórsetkishteri, ınvestısııalyq áleýeti, yntymaqtastyqtyń keleshek negizgi baǵyttary jóninde aıtyp berdi. Sonymen qatar ol ınvestısııalyq jobalardy birlese júzege asyrýy keńeıte túsýge úmit artatynyn da jetkizdi.
Tatarstan Investısııalyq damý agenttiginiń jetekshisi Talııa Mınýllınamen bolǵan kezdesýde atalǵan agenttik qostanaılyq qonaqtarǵa tusaýkeser jasap respýblıkanyń ınvestısııalyq áleýetin aıtyp berdi. Tatarstan Reseı Federasııasy boıynsha ınvestısııa tartýda kóshbasshy bolyp keledi jáne bul iste jaqsy tájirıbe jınaqtaǵan.
О́z kezeginde Meıirjan Myrzalıev te Qazaqstanda ınvestısııa tartý jóninde ulttyq strategııa qabyldanǵanyn, ony ázirleý barysynda Qostanaı oblysy qanatqaqty óńir dep belgilengeninen habardar etti. Sondaı-aq bizdiń delegasııa Tatarstannyń Qurylys, arhıtektýra jáne turǵyn úı-kommýnaldyq sharýashylyǵy mınıstrliginde de boldy. Onda Reseı ınvestısııasy arqyly Qostanaıda júzege asatyn lıft jabdyqtary óndirisi jobasy týraly aıtyldy.
Qostanaılyqtar Qazan qalasyndaǵy «Alabuǵa» erekshe ekonomıkalyq aımaǵy men «Hımgrad» tehnopolısin aralady. Osydan 11 jyl buryn «Alabuǵa» arnaıy ekonomıkalyq aımaǵyna 27 mıllıard rýbl ınvestısııa bólingen bolatyn. Búginde aımaqta mashına jasaý, hımııa, qurylys materıaldaryn óndiretin, metall óńdeý sekildi irgeli kásiporyndar ornalasqan. Al jańa jobany júzege asyram degen ınvestorlarǵa aımaqta jer de usynylady, ınfraqurylymdyq qoldaý da kórsetiledi.
Qostanaı oblysynyń delegasııasy tatar aǵaıyndardyń ınvestısııa tartýdaǵy baı tájirıbesi men úrdisterinen úlgi alyp qaıtty.
Názıra JÁRIMBET,
«Egemen Qazaqstan»
QOSTANAI
