Bizdiń batyr babalarymyz aýmaǵy jóninen álemde toǵyzynshy oryndy alatyn, o sheti men bu shetine qulan jortsa tuıaǵy tozatyn, qyran ushsa qanaty talatyn ulan-ǵaıyr jerdiń shebin ǵasyrlar boıy qanyn tókse de, aryn tókpesten, janqııarlyqpen qorǵady. Beıbit zamanda Uly dalamyzdyń shebin qorǵaýshy jaýynger-shekarashylar da sol batyr babalarymyzdyń búgingi býyny tabylady.
Búginde bes memleketpen shektesetin jáne jalpy uzyndyǵy 15 myń shaqyrymdaı bolatyn shekaramyzda 300-ge jýyq shekara zastavasy qurylǵan. Osy zastavalarǵa san taraptan suqtanǵan jat jurtqa atamekenniń qarys qadamyn da ustatpaı, urpaǵyna tolyq mıras etken batyr babalarymyzdyń atyn bersek, oryndy bolar edi.
Munyń ulaǵatty úlgisi de bar. 2017 jyldyń 3 sáýirinde Úkimettiń qaýlysymen Qyzylorda shekara otrıadynyń «Qyzylqum» shekara zastavasyna Janqoja batyrdyń esimi berildi. Osynyń aldynda, 2014 jyly Qyzylorda oblysynyń Qazaly aýdanynda ótken, Janqoja Nurmuhammedulynyń 240 jyldyǵyna arnalǵan respýblıkalyq aýqymdaǵy is-sharada Qyzylqumdaǵy shekara beketine batyrdyń esimin berý týraly bastamany biz kótergen edik. Mine, osy bastama júzege asyp otyr.
Bul birinshiden, el shebi men ulttyq qaýipsizdikti qorǵaýshy shekarashylarymyzdy darhan dalaǵa qalqan bolǵan batyr babalardyń uly rýhynda tárbıeleýge úles qosady.
Ekinshiden, Qazaqstan tarıhynda erekshe oryn alar tulǵalardyń atyn máńgi qaldyrýǵa qyzmet etedi.
Úshinshiden, Elbasy rýhanı jańǵyrýǵa arnalǵan maqalasynyń «Týǵan jer» bóliminde usynǵanyndaı, «esimderi el esinde saqtalǵan birtýar perzentter» arqyly jas urpaqtyń týǵan jer tarıhyn tanýyna yqpal jasaıdy.
Tórtinshiden, batyr babalar atymen atalǵan shekaralyq zastavalar – ózge memleketter azamattaryna Qazaqstandy óz tarıhyn jáne er ulandaryn ulyqtaıtyn, umytpaıtyn solardyń bıik rýhymen rýhtanatyn ór ári órkendi el retinde kórsetip turady.
Besinshiden, bul mesenattardy shekaralyq zastavalarǵa kómek kórsetip, qamqorlyq jasaýǵa tartýǵa jol ashady. О́ıtkeni shekarashylar óz qyzmetine qajettiniń barlyǵymen qamtamasyz etilgenimen, shekaralyq zastavalardyń kóbi keńes zamanynda turǵyzylǵan jáne materıaldyq-tehnıkalyq bazasy toza bastaǵan.
Men osy oıymdy aıtyp, Premer-Mınıstrdiń orynbasary Erbolat Dosaevqa depýtattyq saýalmen usynys jasadym. Onda Janqoja batyrmen qatar Qarasaı, Bógenbaı, Qabanbaı, Naýryzbaı, Er Jánibek, Raıymbek, Jalańtós bahadúr jáne basqa da batyrlarymyzdyń esimderin elimizdiń ár óńirindegi shekara zastavalaryna berý máselesin qarastyryp, tıisti nusqaý berýi suraldy. Meniń oıymdy Premer-Mınıstrdiń orynbasary qoldar degen úmittemin. О́ıtkeni Qazaqstannyń ejelgi jáne keıingi tarıhyndaǵy uly tulǵalardy ulyqtaý ulttyq sanany jańǵyrtýǵa baǵyttalǵan mańyzdy qadam ekeni anyq qoı. Meniń usynysymdy áriptesterim N.Ábdirov pen Q.Sultanov ta qoldady.
Bahytbek SMAǴUL,
Májilis depýtaty
