Iá, rasymen de «Astana» fýtbol klýby Eýropa lıgasynda óner kórsetip, aladop jankúıerlerin dán rıza qylyp júr. Kúni keshe ǵana Izraıl eliniń «Makkabı» degen komandasyn «Astana-Arenada» 4:0 esebimen jeńdi. Hokkeıdegi «Barysymyz» qarsylas bitkenge tyrnaǵyn batyryp, Qurlyqtyq hokkeı lıgasynyń azýly ujymdarynyń birine aınaldy. Al «Astana» Pro Team velokomandasy bıyldyń ózinde úsh grand-týrda oıqastap óner kórsetti. Qanshama kezeńdi jeńip, komandalyq esepte Ispanııa «Výeltasyn» utty. Al osy ujymdarmen qatar bir bıýdjetten qarjy alyp júrgen «Astana» basketbol klýby shynyn aıtqanda kórermen kózaıymyna aınal almaı júr. Kórermen demekshi, bul klýbtyń «Saryarqa» velotreginde ótkizetin oıyndaryna nebári 300-500 jankúıer ǵana keledi. Tek merekelik kúnderi myńǵa jetip jyǵylady. Kórermeni joq bolsa, komandanyń bolashaǵy da neǵaıbyl. Sońǵy 5 jyl boıy óz oıyndaryna jankúıer tarta almaǵan komandaǵa nesine qarjy bólip, qarajat jumsaımyz deýińiz de múmkin.
Komanda qurylǵaly beri 6 jyl ýaqyt ótti. Alaıda, Eýrolıgalarda sátsiz óner kórsetý de. Eýrolıgany qoıa turyńyz, VTB Birińǵaı lıgasynyń ózinde aýtsaıder qatarynda. Olımpıada chempıony Valerıı Tıhonenko basqaratyn ujym nege ekeni belgisiz, únemi sátsizdikterden kóz ashpaı keledi. Komanda qurylysymen birden bilikti bapker ıtalııalyq Matteo Bonıochollı shaqyrtyldy. Odan keıin serb Mılosh Trıfýnovıch tizgindi ustady. Artynsha kelgen lıtvalyq Ramýnas Býtaýtas ta, «Astananyń» tasyn órge domalata qoımady. Jyl saıynǵy ádet boıynsha bıyl da bapker aýysty. Kezek grek bapkerlerine kelip, ótken jyly Ilııas Papateadorýǵa sensek, bıyl onyń ornyna Kostas Flevarakısti aldyrttyq.
Alaıda, bıylǵy maýsymda komandamyz alǵashqy úsh oıynnyń úsheýinde de jeńilis tapty. 22 qazan kúni Belorýstiń «Smokı» komandasyna 9 upaı aıyrmashylyǵymen jeńilgenimiz tipti uıatty jaǵdaı. Onyń aldynda óz alańymyzda «Zenıtke» de týra 9 upaımen jeńildik. Máskeýlik SSKA tipti 20 upaı basymdylyǵyn kórsetti. Bul jaǵdaı, árıne oılandyrmaı qoımaıdy. Bizdiń basketbol klýbynyń saıasaty-jergilikti jastardy tárbıeleý. Tájirıbıeli tisqaqqan legıonerlermen aralastyryp sheberlik deńgeıin kóterý edi. Alaıda, bıyl kelgen legıonerlerdiń de sapasy mardymdy emes sekildi. Syrttan kelgen basketbolshylar Djastın Karter, Larrı Gordon, Ike Ýdano, Hordýr Vılhalmson, Entonı Klemmons jáne Leonıdas Kaselakıs sekildi ortańqol sportshylar. Al otandyq basketbolshylardan quramda bıyl Rýstam Erǵalı, Rýstam Murzaǵalıev, Anton Ponomarev, Aleksandr Jıgýlın, Dmıtrıı Gavrılov, Maksım Marchýk, Denıs Degtıarev, Vadım Sherbak, Anatolıı Kolesnıkovter bar.
Biraq, «Astananyń» maýsym bastalmas buryn qyrkúıektiń ortasynda júlde alǵanyn da umytpaýymyz kerek. Komandamyz Qytaıdyń Chenchjoý qalasynda Azııa qurlyǵynyń chempıondar lıgasynda qola júldeger atandy. Bul el basketbolynyń tarıhynda oıyp turyp oryn alatyn jetistik. Degenmen, komanda negizgi mindeti-kári qurlyqta tanylyp, Qazaqstannyń atyn shyǵarý. О́zge komandalarymyz jasaǵan erlikti basketbolshylarymyz da jasaýy tıis. Áljan Jarmuhamedov sekildi basketbolshylar shyqqan elde talanttar kende bolmaýy kerek. «Astana» basketbol komandasy kelesi kezdesýin 30 qazan kúni túzde reseıdiń «Hımkı» komandasyna qarsy ótkizedi.
Ermuhamed MÁÝLEN,
«Egemen Qazaqstan»
