Atalmysh zalda latyn álipbıindegi ulttyq alfavıt, semınar-trenıngter, oqý kýrstary, lıngvıst ǵalymdardyń onlaın keńesteri oqytylatyn bolady. Ulttyq akademııalyq kitaphananyń dırektory Úmithan Muńalbaevanyń sózine qaraǵanda latyn grafıkasyn oqytýǵa arnalǵan mundaı ortalyqtar elimizdiń barlyq kitaphanalarynda ashylmaq. Al, elorda kitaphanasynda mundaı zaldyń ashylýy – tarıhı máni bar oqıǵa.
«Latyn álipbıi zalynyń» Ǵarıfolla Esim, Ábdijálel Bákir, Qarjaýbaı Sartqojauly, Bolat Qorǵanbek, Sherýbaı Qurmanbaıuly syndy elge belgili ǵalymdar, qoǵam qaıratkerleri, sondaı-aq, kitaphana qyzmetkerleri men elordadaǵy №40 mekteptiń oqýshylary qatysty. Oqýshylar «Latyn álipbıi zalyna» qoıylǵan 1929-1940 jyldar aralyǵynda jaryq kórgen latyn grafıkasy negizindegi qazaqstandyq kitaptar men merzimdi basylymdardyń kórmesine kýá bop, latyn grafıkasynyń jańa nusqasy boıynsha óz aty-jónderin jazysty.
Zaldyń ashylýyna jıylǵan ǵalymdar bul oraıda aıtýly sharaǵa qatysýshylarǵa qarata óz oı-pikirlerin aıtty. Mysaly, fılosofııa ǵylymdarynyń doktory, akademık Ǵarıfolla Esim latyn grafıkasyna qatysty Elbasynyń shyǵarǵan jarlyǵyn oılaý júıemizdi ózgertetin úlken oqıǵa retinde baǵalady. «Biz táýelsizdik alǵanmen, jazýda táýelsizdikke qolymyz jetpeı júrgen edi. Bıylǵy 26-qazanda Elbasy olqylyqtyń ornyn toltyrdy. Endi jańa álipbı úlgisi qabyldandy. Endi osymen júremiz. Qosarlanǵan degen uǵym múlde bolmaıdy. Bir sózdi qazaqsha kırıllısamen jazyp, astyna oryssha kırıllısany taǵy qosaqtaý endigi jerde bolmaıdy. Jazýda bir ǵana latyn grafıkasyn paıdalanamyz», dedi Ǵ.Esim.
Al, Ábdijálel Bákir óziniń osy grafıkaǵa aýysýdy 1997 jyldan beri kútip kelgenin aıtyp, latyn jazýynyń qazaqty toptastyrýy kerektigin alǵa tartty. «Bizdiń birligimiz, tirligimiz myqty bolýy kerek. Osy jerde jastarǵa aıtarym, latyn jazýy – bizdiń bolashaǵymyz. Sondyqtan osy jazýdy qazirden bastap úırenýge, jazýǵa shaqyramyn», dedi qoǵam qaıratkeri.
Aıgúl SEIIL,
«Egemen Qazaqstan»
