О́ndiristik ósim 4,7 paıyzdy qurap, 1077 mlrd teńgeniń ónimi óndirilgen. О́ńirdegi 9,1 paıyzdyq deńgeıdi quraǵan óńdeý ónerkásibiniń ósimi Qazaqstan aýmaǵynda kósh basynda tur. Oblys ekonomıkasyna tartylǵan ınvestısııanyń eseptik kezeńde 21,1 paıyzǵa ósken naqty kóleminiń ındeksimen de aldyńǵy qatarda. Aýyl sharýashylyǵynyń jalpy kóleminiń ósimi 3,9 paıyzdy qurasa, áreket etetin shaǵyn jáne orta bıznes sýbektileriniń sany 10,9 paıyzǵa, bólshek saýda aınalymy 7,9 paıyzǵa jetken.
B.Saparbaev qurylys kóleminiń ósimi 10,3 paıyzdy qurap, 390 myń sharshy metr turǵyn úı paıdalanýǵa berilgenin aıtty. Jyl sońynda 650 myń sharshy metr turǵyn úı ıelerine tapsyrylmaq. «Oblystyń salyq salý negizi de artty. О́tken jylmen salystyrǵanda kólem 72,5 mlrd teńgeni qurap, 7 paıyzǵa ósti. Ekonomıka ósimi men áleýmettik turaqtylyq óńirdegi jumyspen qamtýdy saqtap qalýǵa múmkindik berdi. Jumyssyzdyq 4,8 paıyz deńgeıinde. 15,2 myń jańa jumys orny quryldy. Jyl sońyna deıin 1,3 myń jańa jumys orny ashylady», dedi ákim.
B.Saparbaev Prezıdent bastamasymen postkeńestik keńistikte jańa tehnologııalar men ınvestısııalardy tartý jáne engizý maqsatynda ótken EKSPO-2017 halyqaralyq kórmesiniń sátti uıymdastyrylǵanyn áńgimeledi. «Halyqaralyq mańyzdy sharany 140 myń aktóbelik kórse, onyń 92-si – oblystyń anaǵurlym iri kásiporyndarynyń ókilderi, 20 myńnan astamy – óz óndiristerine aldyńǵy qatarly tehnologııalardy engizý múmkindikterin úırengen kásipkerler», dedi ol. Nátıjesinde oblystaǵy kásiporyndar kórmede usynylǵan 18 úzdik álemdik tehnologııany tańdap alǵan. Bul jańalyqtardy qoldaný óńirdiń ekologııalyq jaǵdaıyn jaqsartýǵa, energııany tutyný men eńbek ónimdiliginiń tıimdiligine oń áserin tıgizbek. Olardy transfertteıtin ınvestısııa kólemi – 43 mlrd teńge.
Ákim baspasóz máslıhatynda oblystaǵy údemeli ındýstrııalyq-ınnovasııalyq damý memlekettik baǵdarlamasy jobalarynyń júzege asyrylýy týraly da aıtty. «Ekinshi besjyldyq aıasynda 127 mlrd teńgeni quraıtyn ınvestısııaǵa 1,8 myń jumys ornymen qamtamasyz etetin 16 joba júzege asyrylýda. Olardyń ishinde ınvestısııalar kólemi 18,5 mlrd teńgeni quraıtyn 14 joba iske qosyldy. Myńnan asa jumys orny quryldy», dedi baıandamashy. Budan basqa 2017 jyly baǵdarlamadan tys 13,8 mlrd teńgeni quraıtyn 8 ınvestısııalyq joba josparlanǵan, onyń ishinde 6,7 mlrd teńgeni quraıtyn 4 jobasy iske qosylyp, 265 jumys orny ashylǵan.
Oblys ákimi Qazaqstannyń batysynda alǵash ashylǵan «Aktobe Medical Center» medısınalyq klasteriniń damýy jaıynda áńgimeledi. Búginde onda 400-den astam joǵary tehnologııalyq ota jasalsa, onyń ishinde baýyr men búırekti aýystyrý syndy kúrdeli otalar da bar. Jańa tehnologııalardy ázirleý men engizýdegi áriptester – Ońtústik Koreıa, Polsha, Túrkııa jáne basqa elderdegi eń myqty dárigerler men medısınalyq uıymdar. «Medısınalyq klasterdi damytýda memleket-jekemenshik áriptestigi tetikteri belsendi qoldanylýda. Máselen, túrik ınvestorlary 2,4 mlrd teńge turatyn jedel járdem stansasyn saldy. Biregeı qurylys nysany – oftalmologııalyq aýrýhananyń, 300 kelýshige arnalǵan qalalyq balalar stomatologııasynyń qurylysy aıaqtalýǵa jaqyn, pozıtrondy-emıssıondy tomografııalyq ortalyqtyń, eki qalalyq emhana men 20 densaýlyq saqtaý mekemesiniń qurylys jumystary júrýde. Aımaqta densaýlyq saqtaý salasynda MJÁ boıynsha jalpy quny shamamen 14 mlrd teńgeni quraıtyn 26 nysan salynýda», degen B.Saparbaev barlyq nysanda EKSPO-2017 kórmesinde usynylǵan nemis, ońtústikkoreıalyq, aýstrııalyq jáne túrik óndirýshileriniń ınnovasııalyq ázirlemeleri men jabdyqtary qoldanylatynyn málimdedi. Sonymen qatar óńirde ómir súrý uzaqtyǵyn arttyrý, jalpy jáne náresteler óliminiń azaıýy baıqalady.
Oblysta bıyl memleket-jekemenshik áriptestigi men bıznestiń áleýmettik jaýapkershiligi aıasynda shamamen 50 mlrd teńgege jýyq ınvestısııa kólemin quraıtyn 125 joba júzege asyrylýda. «Memleket basshysy MJÁ damytýǵa erekshe kóńil bóledi. Bul mehanızm uzaq merzimdi perspektıvaǵa oblystyq bıýdjetke degen júktemeni azaıtyp qana qoımaı, halyqtyń áleýmettik qamsyzdandyrý máselesin jaqsartady», dedi óńir basshysy.
Aımaq bıznestiń áleýmettik jaýapkershiligin jáne memlekettik-jekemenshik seriktestikti damytýda jetekshi orynda tur. Máselen, «Qazhrom» TUK» AQ bıznestiń áleýmettik jaýapkershiligi aıasynda 1,5 mlrd teńgeni quraıtyn balalardy damytýǵa arnalǵan shyǵarmashylyq akademııasyn salǵan. «CNPC-Aqtóbemunaıgaz» AQ qarajaty esebinen Qazaqstannyń batys aımaǵyndaǵy eń iri óner ortalyǵy irge qalaǵan. «Sábı» jeke qaıyrymdylyq qorynyń ınvestısııalary arqasynda «Meıirim» áleýmettik beıimdelý ortalyǵy turǵyzyldy. Qazaqstanda balamasy joq bul keshende 16-29 jas aralyǵyndaǵy balalar úıiniń toqsannan asa túlegi jumys isteıdi. Berdibek Saparbaev jıyn barysynda tilshiler saýaldaryna jaýap berdi.
Ashat RAIQUL,
«Egemen Qazaqstan»
