Endigi jerde týysqandarymen bıznes bastaýǵa bel baılaǵandarǵa arnaıy kýrstarǵa qatysyp, keńes alyp otyrǵan artyqtyq etpeıdi. Arnaıy bıznes-trenıngterde aǵaıyndar arasynda kıkiljińder men túsinispeýshilikter týyndatpaýdyń joldary túsindiriledi.
Bul jobaǵa Qazaqstandaǵy otbasylyq bıznes qaýymdastyǵy muryndyq bolyp, Almaty qalasynyń kásipkerler palatasy men birqatar uıymdar qoldaý tanytyp otyr.
Qalalyq kásipkerler palatasy aldymen álemge tanymal otbasylyq bıznes bizdiń elimizde onshalyqty damymaǵanyn alǵa tartty. Otandastarymyz aqshaǵa bola týysqandyq qarym-qatynasty buzyp almas úshin aǵaıyndarymen birge is bastaýǵa abaılap qaraıdy. Alaıda statıstıka basqasha sóıleıdi. Shet memleketterde ekonomıkanyń damýyna otbasylyq bıznestiń berip otyrǵany qomaqty kórinedi. Máselen, AQSh-ta árbir besinshi kompanııa otbasylyq bıznespen aınalysady. Eýropa elderindegi, Japonııadaǵy kompanııalardyń 80 paıyzy týystardyń ortaq kásibi bolyp tabylady. Al Úndistandaǵy kásiporyndardyń 95 paıyzy otbasylyq bızneske tıesili.
«Biz bıznes pen týystyq baılanystar qabyspaıdy degen taptaýryn kózqarasty joıý úshin «Áýlet» jobasyn qolǵa aldyq. Elimizde mundaı trenıngter alǵash ret ótkizilip otyr. Jobada kásipkerliktiń kózderi ǵana emes, seriktestermen, ıaǵnı týystarmen tatý qarym-qatynasty saqtaı otyryp, jumys pen tabysty qalaı bólý kerektigi úıretiledi. Bizde jıi qaıtalanatyn qatelik – kelisimsharttarda taraptardyń quqyqtary men mindetteri atap kórsetilmeıdi. Ári otbasylyq kásiporyn ádette uzaq jylǵa eseptelgen bıznes ekenin umytpaǵan jón. Osy rette az ǵana tabysty emes, kompanııanyń abyroıyn este saqtaǵan abzal», dep atap ótti Qazaqstandaǵy otbasylyq bıznes qaýymdastyǵy úılestirý keńesiniń tóraıymy Iаna Isakova.
Sonymen, oqý kýrstary 28 qazannan bastaldy. Kezdesý alty apta boıy ár juma saıyn ótedi. О́ńirlerdegi aǵaıyndar ári-beri shapqylamaı-aq, trenıngterge onlaın rejimde qatysa alady.
Aınash ESALI,
«Egemen Qazaqstan»
