Aspanasty elindegi ótken on shaqty kúnde Gúlbaný baıqaýǵa qatysýshylarymen baýyr basyp, óz eli Qazaqstandy tanystyryp júr dese de bolady. Sheshýshi sátterge jetkenshe dúnıeniń tórt túkpirinen jınalǵan sulýlar túrli sharalar aıasynda Pýerto-Rıkoda «Álem arýy-2016» tájin kıgen Stefanı Del Vallemen de kezdesip úlgergen.
«Baıqaýǵa kelgenime kóp bolmasa da, mundaǵy jaǵdaıǵa qaıran qalyp turmyn. Ár qatysýshy ózinshe sulý. Biz dostasyp ta úlgerdik, bir-birimizge qoldaý kórsetýge tyrysyp baǵýdamyz. Alǵashqy kúni-aq árqaısymyz óz elimizden ákelgen syılyqtarymyzdy bir-birimizge tartý ettik. Qazir sóılesip, óz salt-dástúrimizben, ulttyq taǵam mázirlerimen, mádenıetimizben bólisý ústindemiz. Maǵan barynsha qoldaý kórsetip júrgen otandastaryma alǵys aıtqym keledi. Bul maǵan kúsh-qýat jáne ózime degen senimdilik beredi», dep sálemdeme joldaıdy sulýymyz.
Bul kúnderi baıqaýǵa qatysýshylar qyzý daıyndyqqa kirisken. Endi jaqyn kúnderi baıqaýdyń bastapqy synaqtary da bastalady. Onyń ishinde sporttyq, áleýmettik jáne mádenı is-sharalar da bar. Baıqaý barysynda «Qazaqstan arýy» Aral teńiziniń máseleleri men ony sheshý joldary týraly ekologııalyq jobasyn usynady.
Aıtqandaı, bıyl «Álem arýyn» uıymdastyrýshylar onyń formatyn azdap ózgertýdi uıǵarǵan. Bul baıqaý Head-to-Head Challenge formatynda ótkiziledi. Uıymdastyrýshylardyń pikirinshe, áleýmettik jeliler men ınterbelsendilikke basa nazar aýdarylady. Fınalǵa tek 40 qatysýshy ǵana ótedi. Olar túrli synaqtar men daýys berý nátıjeleri boıynsha anyqtalady.
«Álem arýy» baıqaýynyń eń basty mıssııasy «Maqsatqa bastaǵan sulýlyq» (Beauty with a Purpose) bolsa, osynaý qaıyrymdylyq jobasy ǵana ózgerissiz qalady. Árbir jeńimpaz bir jyl boıy erikti elshi bolyp, ártúrli elderge barady. Halyqaralyq «Variety International» qaıyrymdylyq qoryna arnap qarajat jınaý maqsatynda dúnıejúzilik qaıyrymdylyq is-sharalaryna qatysady. О́z kezeginde «Variety International» 1928 jyldan bastap múgedekter men baqytsyz adamdarǵa kómek kórsetedi.
Aınash ESALI,
«Egemen Qazaqstan»
