Eske sala ketetin bolsaq, onda kepilger memleketter Túrkııa men Iran delegasııasyn Syrtqy ister mınıstrleriniń orynbasarlary Sedat Onal men Hýseın Djaberı Ansarı, al Reseı Federasııasynyń delegasııasyn Reseı Prezıdentiniń Sırııa jónindegi arnaıy ókili Aleksandr Lavrentev bastady. Sırııa úkimetiniń delegasııasyn osy eldiń BUU-daǵy ókili Djafarı Bashar, al qarýly oppozısııalyq toptardyń delegasııasyna Aqyldastar keńesi qozǵalysynyń ókili Ahmad Berrı basshylyq etti. Bulardan basqa kelissóz ústeline baıqaýshy retinde AQSh pen Iordanııa jáne BUU ókilderi qatysty.
Delegasııa músheleriniń sońǵy otyrysqa shyqqanda qatty sharshaǵandary kórinip turdy, osydan-aq kelissózderdiń óte aýyr bolǵanyn sezýge bolady. Kepilger memleketter Iran, Reseı jáne Túrkııa delegasııalarynyń birlesken málimdemesin Qazaqstan Respýblıkasynyń Syrtqy ister mınıstri Qaırat Ábdirahmanov oqyp, jarııa etti. Onda aldymen Islam Iran Respýblıkasy, Reseı Federasııasy jáne Túrkııa Respýblıkasy Sırııa Arab Respýblıkasyndaǵy qarýly qaqtyǵystardy toqtatý rejimin saqtaıtyn kepilger memleketter retinde birlesken málimdeme qabyldaǵany aıtyldy.
Sırııa Arab Respýblıkasynda Astanadaǵy 2017 jyldyń 4 mamyrynda kelisilgen Memorandým boıynsha deeskalasııa zonasyn qurý jónindegi sharttyń iske asqanyn qanaǵatpen atap ótedi, delingen Málimdemede. Sonymen qatar Sırııa Arab Respýblıkasynyń egemendiginiń, aýmaqtyq tutastyǵy men birliginiń saqtalýyn qoldaıtynyn kepilger taraptar rastaıdy. Odan ári Málimdemede: Soǵys qımyldaryna qarsy áreketterdi qoldap, qaqtyǵystardy toqtatý rejimin nyǵaıtqannyń arqasynda (sonyń ishinde deeskalasııa zonasyn qurý men qaýipsizdik jolaqtaryn qurý da bar) búgingi tańda Sırııadaǵy zorlyq pen qantógister deńgeıiniń tómendeýin ataı otyryp:
Birinshiden, IGIL, «Djabhat ál-Nýsra» jáne basqa da toptardyń, kásiporyndar men uıymdardyń terrorıstik áreketterine qarsy kúresterdiń progreske aıaq basqanyn atap ótedi. Deeskalasııa zonalarynyń iske asyrylýynyń nátıjesinde osy atalǵan toptar men uıymdarǵa qarsy áreketter zonanyń ishinde de, syrtynda da jalǵasyn tabatyn bolady;
Ekinshiden, Sırııadaǵy kıkiljińder áskerı jolmen sheshilmeı tek qana BUU Qaýipsizdik Keńesiniń №2254 qararyna sáıkes saıası prosesterdiń barysynda rettelýi kerektigin atap ótedi. Qaqtyǵysqa qatysýshy jaqtardy «jerdegi» qolaıly jaǵdaılardy paıdalanyp, Jenevadaǵy saıası prosesterdi ilgeriletýde belsendilik kórsetýge shaqyrady;
Úshinshiden, BUU-nyń baqylaýymen Jeneva prosesiniń sheńberinde Ulttyq únqatysý kongresin qurý jónindegi Reseı Federasııasynyń usynysyn talqylaýǵa kelisedi; (Bul týraly Reseı taraby barlyq kepilger elderdi qulaqtandyrǵan);
Tórtinshiden, kıkiljińge qatysýshy taraptar bir-birine degen senimdi nyǵaıtý qajettigin atap ótedi. Sonyń ishinde ustalǵandar men kepilge alynǵandardy qaıtarý, ólgenderdiń máıitin berý jáne habarsyz joǵalǵandardy tabý jumystary saıası prosester men atysty toqtatýǵa jaqsy jaǵdaı qalyptastyrady;
Besinshiden, Sırııaǵa halyqaralyq qaıyrymdylyq kómekterdiń odan ári jetkizilý qajettiligin ataıdy, olardyń muqtaj jandarǵa eshqandaı kedergisiz, jyldam barýynyń qamtamasyz etilýin atap ótedi jáne osyǵan baılanysty Memorandýmnyń talaptaryn eske salady;
Altynshydan, Astana prosesiniń sheńberinde 2017 jyldyń 4 mamyrynda qabyldanǵan Memorandýmnyń sharttaryn oryndaý jumystaryn odan ári jalǵastyrý nıeti bar ekenderin rastaıdy;
Jetinshiden, joǵary mártebeli Qazaqstan Respýblıkasynyń Prezıdenti Nursultan Nazarbaevqa jáne Qazaqstan bıligine Astanada 7-shi halyqaralyq kezdesýdi joǵary deńgeıde uıymdastyrǵany úshin alǵystaryn bildiredi;
Segizinshiden, Sırııa boıynsha kelesi joǵary deńgeıdegi kezdesýdi Astana qalasynda 2017 jyldyń jeltoqsan aıynyń ekinshi jartysynda ótkizýge sheshim qabyldady.
Syrtqy ister mınıstri Qaırat Ábdirahmanov osy Birlesken málimdemeni jarııa etken soń Qazaqstannyń Sırııadaǵy kıkiljińdi beıbit jolmen sheshýge budan ári de qolushyn beretinin atap ótti. Qazaqstan barlyq eldermen de jaqsy qarym-qatynas jasaýǵa daıyn, dep mınıstr óziniń sózin qorytty.
Osydan keıin Sırııa Arab Respýblıkasynyń, Sırııadaǵy qarýly oppozısııalyq kúshterdiń jáne Reseı Federasııasynyń ókilderi jýrnalıstermen baspasóz máslıhatyn ótkizip, olardyń kóptegen suraqtaryna jaýap berdi.
