Foto: BBC
Oqıǵa qalaı boldy?
Oqıǵa jergilikti ýaqyt boıynsha túski saǵat 15:05-te boldy. Polısııanyń habarlaýynsha, shaǵyn júk kóligi velosıped jolyna shyǵyp, adamdardy qaǵyp ótken. Mektep avtobýsyna soǵylǵan soń qolynda eki qarýy bar júrgizýshi kólikten shyǵyp, oq jaýdyrǵan. Polısııa kúdiktini jaraqattap, qamaýǵa aldy.
Resmı málimet boıynsha, 6 adam oqıǵa ornynda, 2 adam aýrýhanada qaıtys bolǵan. 11 adam asa aýyr halde aýrýhanaǵa jetkizilgen.
Nıý-Iork meri Bıll de Blazıo jýrnalısterge bergen suhbatynda "Bul, sózsiz, qarapaıym, esh jazyǵy joq adamdarǵa qarsy terrorlyq akti", dedi.
Ázirge eshqandaı terrorıstik uıym bolǵan oqıǵany óz moınyna almady. Alaıda, lańkesterdiń qyzmetine monıtorıng jasaıtyn SITE Intelligence Group kompanııasy shabýylǵa deıin qylmysker telefonyna sýretke túskenin, onda "Islam memleketi" týynyń sýreti turǵanyn aıtty.
Kúdikti kim?
Qamaýǵa alynǵan 29 jastaǵy Saıfýllo Saıpov О́zbekstanda týyp-ósken. AQSh-qa 2010 jyly kelgen. Aldymen Florıda shtatynda turǵan, Keıin Nıý-Djersı shtatynyń Paterson qalasyna kóshken. Áıeli, 3 balasy bar.
Jýrnalıster Saıfýllo Saıpovtyń eki ret jol erejesin buzǵany úshin qamaýǵa alynǵanyn anyqtady.
Donald Tramp ne dedi?
AQSh Prezıdenti Donald Tramp qaza tapqandardyń otbasyna kóńil aıtyp, "Biz terrorıstik uıymdardyń elimizge kirýine jol bermeýimiz kerek", dep jazdy.
CNN Aq úıdiń bas apparaty qyzmetkerleriniń biri Donald Trampqa oqıǵa týraly aıtqanyn habarlady. Al Aq úıdiń baspasóz hatshysy Sara Sanders "Prezıdent Nıý-Iorktegi oqıǵa týraly habardar. Jańa aqparat shyǵa salysymen, oǵan baıadalatyn bolady", dedi.
Osy málimdemeden keıin Tramp Tvıtterge "Nıý-Iorkte asa qaýipti adam shabýyl jasapty. Quqyq qorǵaý oryndary oqıǵany nazarda ustaıtyn bolady", dep jazdy.
Resmı uıymdardyń málimeti
Nıý-Iork polısııasynyń basshysy Djeıms O'Nıl baspasóz konferensııasynda qylmyskerdiń "Allahý akbar" dep aıǵaılaǵanyn rastady. "Saıpovtyń aıtqany men jalpy jaǵdaıǵa qarap bul oqıǵanyń terrorıstik áreket ekenine kóz jetkizýge bolady", dedi ol. Al shtat gýbernatory Endrıý Kýomo kúdiktiniń jalǵyz áreket etkenin aıtty. "Bul uıymdasqan qastandyq nemese jospar deýge kelmeıdi. Bul bir adamnyń áreketi", dedi ol baspasóz konferensııasynda.
Nıý-Iorktyń polısııa departamenti basqa kúdiktiler izdestirilmeıtinin aıtty. Degenmen, bılik oqıǵanyń mán-jaıyn anyqtaý úshin Saıpovtyń tek AQSh-taǵy emes, О́zbekstandaǵy tanystaryn da anyqtaıtyn bolady.
Sondaı-aq qala bıligi oqıǵaǵa qaramastan Nıý-Iorktegi Helloýındi toılaýǵa arnalǵan dástúrli sherý belgilengen ýaqytta ótetinin málimdedi.
Daıyndaǵan Gúlnur Qýanyshbekqyzy,
"Egemen Qazaqstan"
