Osy oraıda bizdiń áriptesimiz Nazgúlim Ilıasovanyń Kembrıdj baǵdarlamasynyń I deńgeıimen sertıfıkattalyp, 2014-2015 oqý jylynda jańa baǵdarlamany, aqparattyq tehnologııany ózi ǵana qoldanyp qoımaı, ózi jumys atqaratyn «Babaı-Qorǵan» jalpy orta mektebi muǵalimderiniń jańa kózqaras, serpinmen, izdenispen jumys isteýlerine úlken qozǵaý salyp, únemi izdeniste júretin eńbekqorlyǵyn aıtqym keledi. Qandaı isti de jańadan bastaý ońaı emes.
Mektebimizde I deńgeımen sertıfıkattalǵan muǵalim bastaýysh synyp, ózin-ózi taný páninen Nazgúlim Ilıasova ǵana. Oqý isiniń meńgerýshisi Roza Ǵaıbýllaevanyń usynysymen qurylǵan shyǵarmashyl eki top eki aýysymda Nazgúlimniń ár aptadaǵy dúısenbi, juma kúnderi ótetin koýchıng sabaqtaryn asyǵa kútedi. Is-tájirıbelerin ortaǵa salady. Kembrıdjdik ádisti durys túsinbegender oqýshylardy eki topqa bólip, tapsyrmany berip, ózińiz qarap otyratyn «ońaı sabaq» dep túsinedi. Nazgúlim muǵalimderdi osyndaı qatelikten saqtandyryp, ustazdyń árqashan shyǵarmashyl izdeniste júrýine, oqytý úshin neni qalaı oqý kerektigine jalyqpaı, baǵyt-baǵdar berip júr.
Jańa formasııa muǵalimi sózin isimen dáleldep, oqýshylardy ǵylymı jumystarmen shuǵyldandyrýda jaqsy tabysqa jetip keledi. «Oqýshylardyń fýnksıonaldyǵyn damytý joldary» taqyrybyndaǵy koýchıng-sessııalary muǵalimderdiń qyzyǵýshylyǵyn týdyrdy. Nazgúlim mekteptegi is-sharalardyń sánin kirgizetin bıshiler tobynyń da jetekshisi. Onyń «Jaýqazyn» bı toby qalalyq saıystardyń bas júldesin eshkimge bermeı keledi. Ol tek mekteptiń ǵana emes, otbasynyń da jylýyn saqtap otyrǵan adal kelin, asyl jar.
Jańashyl ustazdyń tájirıbelerin oı eleginen ótkizip otyryp, oıshyl Plýtarhtyń «Kóptegen tabıǵı keremet talant darynsyz ustazdardyń kesirinen joıylyp ketedi. Olar darynnyń tabıǵı qubylysyna tereń boılaı almaı, tulpardy esekke aınaldyryp qurtyp tynady», degen sózi eske túsedi. Osyndaıda Nazgúlimdeı izdenimpaz muǵalimder kóp bolsa eken dep oılaısyń.
«Dástúrli sabaqtyń kemshin tustary – ustaz oqý ozaty 5-6 úzdik oqýshymen ǵana jumys istep, nátıjege jettim dep oılaıdy. Al jańasha oqytý sabaǵyńyzda is-áreket jasamaǵan oqýshy bolmaıdy jáne ár balada óz-ózine degen senimdilik paıda bolady. Sondyqtan da men bul baǵdarlamany mekteptegi búkil muǵalimniń meńgergenin, oqýshylardyń ózgergenin, jaqsy azamat bolyp óskenin qalaımyn.
Elbasymyz «XXI ǵasyr – bilimdilerdiń zamany» dedi. Biz Memleket basshysy qoıǵan talaptarǵa laıyq bolýymyz kerek», deıdi ol óz oıyn túıindep.
Shamsýlbanat ATABALAEVA,
«Babaı-Qorǵan» jalpy orta mektebiniń
qazaq tili men ádebıeti páni muǵalimi
Ońtústik Qazaqstan oblysy
