Kósheler keńeıedi,
keptelis azaıady
Dál qazirgi ýaqytta oblys ortalyǵyndaǵy tórt birdeı kóshede joldardy keńeıtý jumystary júrgizilip jatyr. Búginde qaladaǵy qurylystardyń deni Jibek matalar shaǵyn aýdanynda qarqyn alǵany belgili. Turǵyn úı deısiz be, balabaqsha deısiz be, emhana deısiz be, barlyǵy osy shaǵyn aýdanda salynyp jatyr. Mundaǵy halyq sany da jyldan jylǵa kóbeıip keledi. Qazir Jibek matalar shaǵyn aýdanyndaǵy Sátbaev dańǵyly boıymen Jibek joly kóshesinen Karl Marks kóshesine deıingi 3,5 shaqyrym joldy keńeıtý jumystary qolǵa alynýda. О́skemen qalasy ákiminiń orynbasary Erjan Qońyrbaevtyń aıtýynsha, buǵan deıin paıdalanylyp kelgen tórt jolaqty jol aldaǵy ýaqytta alty jolaqty jolǵa aınalmaq.
Sonymen qatar jaıaý júrginshilerge jáne velosıped tebýge arnalǵan joldar salynyp, dańǵyl boıyna jańa aıaldamalar ornatylmaq. Buǵan deıin qalalyqtar О́zen vokzaly mańyndaǵy jaǵalaýda ǵana «shaıtanarbamen» júıtkip júrse, endi Jibek matalar shaǵyn aýdanynan qalaǵa deıin velosıpedpen jeldeı esip jetýine múmkindik týǵyzylmaq. Bıyl maýsymda bastalǵan bul jumystar 2018 jyly aıaqtalady dep josparlanyp otyr.
Budan bólek qazir qaladaǵy Jibek joly men Sátbaev dańǵyldarynyń qıylysynda, Ertis ózeni arqyly ótetin kópirden Ahmer aýylyna, Táýelsizdik, Astana men Potanın kósheleri jáne Áýezov dańǵylynan Dańq memorıalyna deıingi aýmaqtaǵy kóshelerdi keńeıtý, abattandyrý jumystary qyzý júrgizilýde. E.Qońyrbaev osyndaı aýqymdy jumystar respýblıkalyq, oblystyq jáne qalalyq bıýdjet qarjysymen júzege asyrylyp jatqanyn aıtady. Osydan birer kún buryn shahardyń ár aýmaǵynda qolǵa alynǵan kóshelerdi keńeıtý jumystarymen tanysqan oblys ákimi Danıal Ahmetov Jibek matalar shaǵyn aýdanyndaǵy qurylys jumystary sátimen aıaqtalsa, 15 jylǵa deıin keptelis máselesin sheshýge yqpal etetinin jetkizdi.
2018 jyly 100 aýla jóndeledi
Qazir О́skemende aýlalardy abattandyrý jumystaryna da aıryqsha kóńil bólinip jatyr. Úsh jylda oblys ortalyǵyndaǵy úsh júzden astam aýla kúrdeli jóndeýden ótkiziledi dep josparlanyp otyr. Oblys basshysynyń tapsyrmasyna sáıkes bıyldan bastap qolǵa alynǵan joba aıasynda 2020 jylǵa deıin shahardaǵy 310 aýlanyń kireberis joldary men kólik turaqtary keńeıtilip, balalarǵa arnalǵan oıyn alańqaılary jóndeletin bolady. «Úsh jylda oblys ortalyǵyndaǵy úsh júzden astam kósheni adam tanymastaı ózgertemiz. Bul maqsatqa bıýdjetten qomaqty qarajat bólinedi. Máselen, 2018 jyly О́skemendegi 100 aýlany abattandyrý, jóndeý jumystaryna bir mıllıard teńge kóleminde qarjy bólýdi josparlap otyrmyz. Mundaı sharýa qalanyń barlyq shaǵyn aýdanynda júrgiziletin bolady. Ásirese kóp jyl boıy jóndeý kórmegen shalǵaı aýlalarǵa basymdyq berilmek», degen-di oblys ákimi D.Ahmetov jýyqta qala turǵyndarymen kezdesýinde.
Búginde osyndaı aýlalardyń alǵashqylarynda tıisti jumystar aıaqtalyp ta qoıdy. Máselen, Pıter kommýnarlary kóshesindegi №20, 22, 24 jáne 26 úılerdiń aýlalary jańadan paıdalanýǵa berilgen kóp qabatty úılerdiń aýlalarynan esh kem túspeıdi. Munda sý jańa balalar alańy men street workout alańy boı kótergen. Balalar oınaıtyn alańǵa jumsaq tósenish tóselip, jańa oryndyqtar qoıylypty. Turmystyq qaldyqtar salatyn arnaıy oryndar da qalpyna keltirilgen. Aýladaǵy kireberis joldardyń eni úsh jarym metrge deıin keńeıtilip, 25 kólikke arnalǵan avtoturaq paıda bolyp, bir ǵana aýlanyń ózinde birneshe beınekamera ornatylypty. Bul óz kezeginde shaǵyn aýdan men aýlalardaǵy qoǵamdyq tártipti nyǵaıtyp, quqyq buzýshylyq sanyn azaıtýǵa septigin tıgizýi tıis deıdi mamandar.
Tize bersek oblys ortalyǵyn abattandyrý, ajarlandyrý baǵytynda az sharýa atqarylyp jatqan joq. О́skemen qalasy ákiminiń orynbasary bul jumystardyń barlyǵy shahar turǵyndarynyń ıgiligi úshin júzege asyrylyp jatqanyn aıtady. Bıyl qalada úlken jeti joba iske asyrylyp jatyr. Táýelsizdik pen Abaı dańǵylynyń qıylysynda jer asty joly salynýda. Komendantka ózenine abattandyrý jumystary júrgizilip, gúlder otyrǵyzyldy. Polısııa beketin ashtyq. Bul jer qazir jurt demalatyn tamasha orynǵa aınaldy. О́skemende memlekettik «Nurly jol» baǵdarlamasy boıynsha birneshe turǵyn úı salynyp, qubyrlar jóndelip jatyr. Búginde qalada eki balabaqsha turǵyzylýda. Jalpy, aldaǵy ýaqytta 11 balabaqsha salýdy josparlap otyrmyz», deıdi E.Qońyrbaev.
Azamat QASYM,
«Egemen Qazaqstan»
О́SKEMEN
