Sebebin surasań, olar ártúrli syltaýlardy alǵa tartady. Birine elektr energııasy, ekinshisine janar-jaǵarmaı baǵasynyń turaqsyzdyǵy «kináli» eken. Tutynýshylardy ol jóninde aldyn ala habardar etip jatqan taǵy eshkim joq.
Áıteýir túsiniksiz bir jaǵdaı, túbine jetip bolmaısyń.
Taıaýda bir tanysymyzben jolyǵyp qaldyq. Paıdalanǵan elektr energııasyna tólem jasap kele jatqan beti kórinedi. Júzinen ashýdyń tabyn baıqap, sabyrǵa shaqyryp, istiń mán jaıyn bilmek bolyp, áńgimege tarttyq.
– Aı saıyn tıisti mekemege baryp, paıdalanǵan elektr qýatynyń aqysyn tólep turamyn. Búgin barǵanymda qyzmetshi qyz paıdalanǵan elektr qýatyna qosymsha taǵy da 70 teńge tóleýim kerek ekenin eskertti. «Ne úshin?» desem, «kórsetken qyzmet úshin» deıdi. Sonda qalaı, ol bizge kórsetken qyzmeti úshin aı saıyn turaqty eńbekaqy alyp otyrǵan joq pa? Múlde mıǵa syıymsyz jaıt. Árkim sonda óziniń oıyna kelgenin isteı bere me? Nege bizdi tıisti oryndar aldyn ala sebebin aıtyp, habardar etpeıdi? Oryndy is bolsa, jaǵdaıdy biz de túsinemiz ǵoı.
Menińshe, bárin «osylaı eken» dep naryqqa jaba berýdi qoıǵan jón tárizdi. Aıtalyq, ómir súrip jatqan aýdan boıynsha 60 myńnan astam halyqtyń kúndelikti ómirde elektr qýatyn turaqty paıdalanatyny belgili jaıt. Osyndaǵy 10 myńnyń ústindegi turǵyn úıde 11 myńnan astam otbasy joǵaryda biz aıtqan elektr qýatyn tutynady eken. Sonda ár tutynýshydan 70 teńgeden alǵannyń ózinde, aı saıyn qansha qarjynyń mekeme kassasyna túsetinin ózińiz esepteı berińiz.
Bireýdiń qaltasyndaǵy qarjyny sanaýdan aýlaqpyz. Alaıda, bes saýsaqtyń birdeı emestigi sekildi, tutynýshylardyń bári birdeı tólem tóleýge qabiletti emes ekendigin de eskerýimiz kerek emes pe?
Meniki durys eken dep, ózim bilermendikke salynyp, zańdy, zańsyz búırekten sıraq shyǵara berý de jón emes-aý...
Bir mezgil halyqtyń jaǵdaıyna qaraǵanǵa da ne jetsin?!
Káribaı ÁMZEULY,
zeınetker
Ońtústik Qazaqstan oblysy,
Sozaq aýdany
