AP Photo / Craig Ruttle
Oqıǵa qalaı órbidi?
Home Depot kompanııasynan 50 AQSh dollaryna shaǵyn júk kóligin jalǵa alǵan júrgizýshi jergilikti ýaqyt boıynsha saǵat 15:15-te (Astana ýaqyty boıynsha 01:15) Nıý-Iorktegi Manhettenniń ortalyǵynda jaıaý júrginshilerge qarsy shabýyl uıymdastyrdy. Ol Ýest-strıt aýdanynda ornalasqan velosıped jolyna shyǵyp, aldyna kezikken barlyq dúnıeni qıratyp, 17 oram júrip ótken. Kólik mektep avtobýsymen soǵysqannan keıin ǵana toqtaǵan. Káýgerler sózine sensek, toqtaı salysymen, ol «Allahý Akbar» dep aıqaılap, qarý alyp, qashpaq bolǵan. Sol mezette polısııa qyzmetkerleri ony jaralaǵan. Belgili bolǵandaı, kúdikti qolyndaǵy qarýlardyń biri peıntbol oıynyna arnalǵan bolsa, ekinshisi pnevmatıkalyq tapansha edi. Nátıjesinde segiz adam ajal qushyp, on bir adam ártúrli jaraqattarmen aýrýhanaǵa tústi.
Global Look Press
Qurban bolǵan kimder?
Sońǵy derekterge súıensek, kóz jumǵan segiz adamnyń beseýi Argentına, al bireýi Belgııa azamaty. Al, elimizdiń Syrtqy ister mınıstrliginiń baspasóz hatshysy Ánýar Jaınaqov bul lańkestik oqıǵadan Qazaqstan azamattary zardap shekpegenin aıtty.
Kúdikti kim?
Álemdik BAQ-ta aıtylǵandaı, kúdiktiniń esimi - Saıfýllo Saıpov. 29 jastaǵy О́zbekstan azamaty 2010 jyly AQSh-qa grın-karta arqyly kelip, basynda Ogaıo, Nıý-Djersı, Paterson qalalarynda tursa, sońǵy ýaqyttary Florıda shtatynyń Tampa qalasynda turaqtaǵan. Úılengen. Jubaıy jáne kishkentaı eki sábıi bar. AQSh-ta Uber kompanııasynda kólik júrgizýshisi bolyp qyzmet atqaryp kelgen. Bul aqparatty kompanııa ókilderi rastap otyr.
Bılik ókilderiniń áreketi qandaı boldy?
Quzyrly organdar kóp ýaqyt ótpeı oqıǵany lańkestik áreket dep resmı túrde habarlady. Qala meri Bılla de Blazıo beıbit halyqtyń ómirin jalmaǵan bul áreketti lańkestiktiń eń zulym túri dep atady. Al, el prezıdenti Donald Tramp aqyl esi durys emes adamnyń áreketi ekendigin atap kórsetti.
Oqıǵadan keıin AQSh Prezıdenti shekaralyq baqylaýdy kúsheıtý týraly ókim shyǵardy. Nıý-Iork shtatynyń gýbernatory Endrıý Kýomo kúdiktiniń kómekshileri joq degen oıyn aıtty.
Ázirge birde-bir lańkestik top qylmysty óz moınyna alǵan joq.
AP Photo / Bebeto Matthews
Eýropadaǵy lańkestik oqıǵalarmen qandaı uqsastyq bar?
Sońǵy jyldary damyǵan terrorıstik aktiler jarylǵysh zattardyń kómegimen emes, qolda bar basqa quraldarmen jasaýda. Naqtyraq aıtqanda, lańkester júk kóligine minip, adamdar kóp shoǵyrlanǵan jerge baryp, beıbit turǵyndardy taptaýdy shyǵardy. Lańkestik shabýyldyń bul túri Anglııa, Fransııa, Germanııa syndy Eýropa elderinde birneshe ret qaıtalanyp, alǵash AQSh-ta bolyp otyr.
Bir aıta keterligi, qazan aıynyń ortasynda AQSh-tyń ulttyq qaýipsizdik mınıstri qyzmetin atqarýshy Eleın Dıýk qandy lańkestik áreketter bolýy múmkin ekenin boljaǵan edi.
Jasulan AIаZBAEV
