Kezdesý barysynda Qazaqstandaǵy evreı qaýymynyń qyzmeti, zamanaýı syn-qaterlerge qarsy kúrestegi birlesken is-áreket jáne dinaralyq kelisimniń qazaqstandyq modeli máseleleri talqylandy.
Memlekettik hatshy Amerıkadan kelgen meımandardyń jumysyna sáttilik tileı otyryp, AQSh-tyń elimiz úshin mańyzdy strategııalyq seriktesiniń biri ekenin atap ótti. Sondaı-aq, eki el arasyndaǵy dıplomatııalyq qarym-qatynastyń ornaýyna 25 jyl tolýyna oraı uıymdastyrylǵan birqatar sharalardyń jemisti bolǵanyn jetkizdi.
«Qazaqstan Prezıdenti Nursultan Nazarbaev pen AQSh basshysy Donald Tramp túrli alańdarda birneshe márte kezdesip, birqatar máselelerdi talqylady. Osy oraıda, biz de áriptestik baılanysty odan ári nyǵaıtyp, Aq úı ákimshiligimen qarym-qatynasymyzdy odan ári berik ete túsemiz dep senemin», dedi G.Ábdiqalyqova.
Memlekettik hatshy alystan kelgen meımandarǵa Elbasynyń bastamalary jóninde keńinen áńgimelep berdi. G.Ábdiqalyqova qoǵamdyq sanany órkendetýge baǵyttalǵan «Rýhanı jańǵyrý» baǵdarlamasy jóninde sóz qozǵady. Ol jańǵyrýdyń basty talaby tól mádenıet pen ulttyq kodty saqtaý ekenine nazar aýdardy. Budan bólek, elimizdiń Ata zańyna engizilgen ózgerister men demokratııaǵa baǵyttalǵan batyl qadamdarmen tanystyrdy.
«Qazaqstan 2050 jylǵa qaraı damyǵan 30 memleket qataryna qosylý maqsatyn alǵa qoıyp otyr. Bıyl Memleket basshysynyń bastamasymen ekonomıkalyq ósimniń jańa modelin qalyptastyrýǵa baǵyttalǵan Úshinshi jańǵyrý bastaldy. Onyń bastapqy nátıjeleri ekonomıkanyń qalpyna kelýi nyǵaıǵanyn kórsetedi. Bıyl elimizdiń jalpy ishki ónimi 3,5 paıyzǵa deıin ósti», dedi Memlekettik hatshy.
Sondaı-aq, G.Ábdiqalyqova elimizde 100-den asa etnostyń tatý-tátti ómir súrip jatqanyn, osyǵan sáıkes Qazaqstan halqy Assambleıasynyń jemisti jumys jasap kele jatqanyn atap kórsetti. Onyń aıtýynsha, qoǵamdyq kelisim men jalpyulttyq birliktiń qazaqstandyq modeli álemge úlgi bolady.
Sońǵy halyq sanaǵy boıynsha, respýblıkada úsh myńnan astam evreı ulty ókili ómir súredi. 1992 jyldan beri 20 etnomádenı birlestikti, birqatar evreı ulttyq uıymdaryn qamtıtyn «Mısva» qaýymdastyǵy jumys istep keledi. G.Ábdiqalyqova Qazaqstanda turatyn evreılerdiń beıbitshilik pen kelisimde ómir súretinin málimdedi.
Osy oraıda, Eýrazııadaǵy evreı qaýymyn qoldaý ulttyq koalısııasynyń tóraǵasy D.Rýbın elimizde ózge ult ókilderine jasalǵan jaǵdaıdy joǵary baǵalap, qazaqstandyq model álemniń kóptegen memleketterne úlgi bolatynyn atap ótti. Mundaı pikirdi uıymnyń vıse-prezıdenti Mark Levın de aıtady.
«Qazirgi tańda Qazaqstanda kóptegen ulttar beıbit, tatý-tátti, qýdalaý men kemsitý kórmeı ómir súrip keledi. Munyń bári Prezıdent Nursultan Nazarbaev pen Qazaqstan halqynyń arqasy. Qazaqstan – antısemıtızmnen ada álemdegi sanaýly eldiń biri», dedi M.Levın.
Abaı ASANKELDIULY,
«Egemen Qazaqstan»
