– Syrt alańdaǵy eýrokýboktyq oıynda jetken alǵashqy jeńisimizge qýanyshtymyn. О́tken jylǵa qaraǵanda bıyl úlken jumys atqardyq. Bir qadam alǵa jyljydyq. Shynyn aıtý kerek, búgingi oıynda alań ıeleri myqtyraq boldy. Keı tustarda jolymyz bolǵany da jasyryn emes. «Makkabı» jaqsy oıyn kórsetip júr dep oılaımyn. Al búgin óz múmkindigimiz bolatynyn ishteı sezdim. Ári sol sátti qarsy shabýyl arqyly utymdy paıdala bildik.
– Syrt alańdaǵy eýrokýboktyq oıyndaǵy alǵashqy jeńisterińizben quttyqtaımyz! Búgingi matchtyń basty qaharmany Nenad Erıch dep aıtýǵa bola ma?
– Naqty bir shákirtimdi bólektep alǵandy unatpaımyn. Búgingi oıynnyń basty qaharmany dep búkil shákirtimdi atar edim. Komandaǵa rotasııa jasaýǵa tyrystyq. Endi oıynshylarym jeksenbi kúngi «Aqjaıyqqa» qarsy oıynǵa daıyn bolǵanyn qalar edim. Basty maqsatymyz – oraldyq ujymdy jeńý.
– Matchtyń sońǵy 20 mınýtynda Djýnıor Kabananga sharshańqylaý kórindi. Ony almastyrý kerek pe edi?!
– Ony almastyrmaǵanymnyń basty sebebi – ózge shabýylshym bolmady. Despotovıch áli daıyn emes edi. Budan bólek qaptal oıynshylarynan da qıyndyqtarymyz boldy.
– Búgingi jeńisti sensasııa dep esepteısiz be?
– Men keshe ǵana jeńiske jeter bolsaq, sensasııa bolyp eseptelmeıtinin aıtqan edim. Al matchtyń favorıti «Makkabı» boldy dep esepteımin.
– Ortalyq qorǵanysta alǵash ret Igor Shıtov, Evgenıı Postnıkov jáne Sergeı Malyı jaýapty boldy. Osyǵan deıin olar birge shyǵyp kórmegen edi. Siz osy jaǵynan qaýiptenbedińiz be? Búgingi nátıjeden keıin «Astananyń» pleı-offqa shyǵý múmkindigin qalaı baǵalaısyz?
– Shynyn aıtaıyn, eshnárseden qaýiptenbedim. Ylǵı da shákirtterime senim artamyn. Ásirese, osyndaı mańyzdy sátterde. Búgingi jeńisimiz búkil Qazaqstan fýtbolyna arnalady. Biz áli de ózimizdi damyta túsýimiz kerek. Osy jaǵynan qazir tıisti jumystar atqaryp júrmiz. Eger 10 upaı ıelensek, toptan shyǵamyz dep oılaımyn. Endi «Vılıarrealdy» nemese «Slavııany» jeńýimiz kerek. Toptan shyqsaq bul bizdiń damyǵanymyzdyń bir belgisi.
Almas MANAP,
«Egemen Qazaqstan» – Netanııadan (Izraıl)
