Apanyń aq taıaǵy uly Ǵabdynasyrǵa mura boldy. Bul aýylǵa sol jyly Dinmuhamed Qonaevtyń ózi kelip, qoıshy anany quttyqtaǵany belgili. Al Shámshi aýylynyń aty aıtyp turǵandaı, aýylǵa kezinde uly kompozıtordyń ózi kelgen. Sondyqtan aýyl turǵyndary uly tulǵalar aıaq basqan aýyldarmyz dep maqtan etedi.
Qazir Shámshi men Shabar aýyldary Qyzylásker aýyldyq okrýgine qaraıdy. Turǵyndar sany az, tórt aýyldy qosqanda bar-joǵy 1423 adam turady. Shabarda 247, Shámshide 201 turǵyn bar. Al mektebinde 7 oqýshy ǵana qalypty. Bul aýyldarda eshqaıda kóshpeı, týǵan aýylym dep turaqtap qalǵan baıyrǵy halyq turady. Mal sharýashylyǵymen aınalysatyn «Dáýren», «Mádı», «Murat», «Nur», «Qońyrǵaq», «Qanat» sekildi sharýa qojalyqtary, kókónis ósirýmen aınalysatyn «Radýga» jáne «Rosa» sharýa qojalyqtary bar.
Amangeldi Jylqybaev bastaǵan aýyl azamattary Shámshi aýylyn kógaldandyrýǵa úlken úles qosýda. Nássredın Japabaev sekildi aýylyna qaıta kóship kelgender de kezdesedi. Aýyl jastary aýyl saıtyn da jasap alypty. Sharýa qojalyqtary basshylary birlesip, mektepke kompıýter syılaǵan eken. Bıyl Shámshi, Shabar aýyldaryndaǵy eski ǵımarattarǵa kúrdeli jóndeý jumystary júrgizildi. Oǵan oblystyq bıýdjetten 25 mıllıon teńge bólinip, merdiger qurylys fırmalary jumysty aıaqtady. Qaıtadan esik ashqan klýb úıleri aýyl turǵyndarynyń kóńilin jadyratty.
Endi, mine, aýyl keshi kóńildi. Shaǵyn ǵana qos aýyl úshin, árıne, klýb ǵımarattarynyń jarqyrap, jańaryp shyǵa kelgeni erekshe qýanysh. Aýyl turǵyndaryn quttyqtaýǵa kelgen oblystyq mádenıet, arhıv jáne qujattama basqarmasynyń basshysy Ardaq Raıymbekov ózimen birge oblystyq «Shańyraq» halyq shyǵarmashylyǵy ortalyǵy men Isa Baızaqov atyndaǵy oblystyq fılarmonııa ánshilerin de erte kelipti. Mádenıet úıine arnaıy qural-jabdyqtar, oryndyqtar, aspaptar, ónerpazdar kıimderi de satyp alynypty.
Bul mádenıet oshaǵynda Nazym Ýálıeva, Botagóz Omarhanova uzaq jyldar boıy eńbek etip keledi. Osy qýanyshty kúni aýyl aqsaqaldary Tólegen, Toqsanbaı, Jumabaı atalar shaǵyn aýyldardy nazardan tys qaldyrmaǵandary úshin alǵys aıtsa, ájeler shashý shashty.
Farıda BYQAI,
«Egemen Qazaqstan»
Pavlodar oblysy,
Lebıaji aýdany
