Depýtattar talqysyna túsken alǵashqy qujat «Eýrazııalyq ekonomıkalyq odaqtyń Keden kodeksi týraly shartty ratıfıkasııalaý týraly» zań jobasy boldy. Bul zań jobasy Joǵary Eýrazııalyq ekonomıkalyq keńestiń otyrysynda 2017 jyldyń 11 sáýirinde Máskeýde jasalǵan Eýrazııalyq ekonomıkalyq odaqtyń Keden kodeksi týraly shartty ratıfıkasııalaýǵa baǵyttalǵan.
«Osy shart negizinde kedendik retteý salasynda mynadaı basym baǵyttar engizilip otyr: taýarlardy qatysýshy elderdiń kedendik aýmaǵyna ákelýge nemese áketýge, kedendik deklarasııalaýǵa jáne taýarlar shyǵarýǵa baılanysty kedendik operasııalardy jasaǵan kezde «biryńǵaı tereze» tetigin paıdalaný; elektrondy kedendik deklarasııalaýdyń basymdyǵy; kedendik deklarasııa tirkelgen kezden bastap tórt saǵat ishinde taýarlar shyǵarýdy júzege asyrý; keden organdarynyń aqparattyq júıelerimen avtomatty túrde kedendik deklarasııany tirkeýge jáne taýarlar shyǵarýǵa baılanysty kedendik operasııalardy jasaý múmkindigi retteledi», dedi T.Súleımenov.
Onyń túsindirýinshe, bul zań jobasynyń negizgi maqsaty Eýrazııalyq ekonomıkalyq odaqta biryńǵaı kedendik retteýdi qamtamasyz etý bolyp tabylady.Kún tártibine saı talqylanyp, birinshi oqylymda maquldanǵan kelesi qujat «Qazaqstan Respýblıkasyndaǵy kedendik retteý týraly» kodeks jobasy boldy. Bul kodeks jobasyn Eýrazııalyq ekonomıkalyq odaqtyń jańa Keden kodeksine sáıkes keltirý maqsatynda ázirlengen. Sol sebepten de kodeks jobasynda ýákiletti ekonomıkalyq operator mártebesi berilýi múmkin zańdy tulǵalardyń sanattaryn ulǵaıtý kózdeledi.
Sonymen qatar syrtqy ekonomıkalyq qyzmetke qatysýshyǵa taýarlardy kedendik deklarasııalaý kezinde kedendik bajdardy tóleýdi keıinge qaldyrýǵa nemese bólip tóleýge múmkindik beriledi. Oǵan qosa, aldyn ala aqparat berilýi múmkin kedendik operasııalardyń túrlerin keńeıtý men aýyzsha saýalnama, kedendik baqylaý, taýarlardyń tańbalanýyn tekserý, kedendik baqylaýdaǵy taýarlardy esepke alý sııaqty qyzmetterdi retteý tetikteri de qarastyrylady.
Depýtattar tarapynan qoldaý tapqan qujattyń sońǵysy zańnamalyq aktilerge kedendik retteý máseleleri boıynsha ózgerister men tolyqtyrýlar engizý jaıyn arqaý etken zań jobasy boldy. Atalǵan qujat «Qazaqstan Respýblıkasyndaǵy kedendik retteý týraly» kodeks jobasynda kózdelgen normalardy iske asyrýdy maqsat etedi. Sondyqtan da zań jobasy bıýdjet kodeksine avanstyq tólemder úshin bıýdjetke túsimderdiń túrin aıqyndaýǵa jáne taýarlardy joıý múmkindigi týraly materıaldarǵa memlekettik ekologııalyq saraptama qorytyndysyn beretin qorshaǵan ortany qorǵaý salasyndaǵy ýákiletti organnyń quzyretin bekitýge kodeks jobasynyń normalaryn sáıkes keltirýge baǵyttalǵan. Bul zań jobasynda Qazaqstan Respýblıkasynyń 25 zańnamalyq aktisine, onyń ishinde 6 kodekske jáne 19 zańǵa ózgerister men tolyqtyrýlar engizý usynylǵan.
Aıta keteıik, osy kúni Májilis depýtattary konstıtýsııalyq zańdarǵa túzetýler engizýge qatysty zań jobasyn óndiristik jumysqa qabyldap, salalyq vedomstvolar men Úkimet basshysynyń atyna óz quzyretteri sheńberinde saýaldaryn joldady.
Nurlybek DOSYBAI,
«Egemen Qazaqstan»
