Astana qalasy Mádenıet, muraǵattar jáne qujattama basqarmasy basshysynyń orynbasary Narıma Muhambetalınanyń aıtýyna qaraǵanda baıqaýǵa qatysýǵa 515 adam ótinish bergen. Elimizdiń búkil óńirlerinen jáne О́zbekstan, Reseı, Bashqurtstan, Latvııa, Armenııa sııaqty elderden kelgen jas qatysýshylar jyldaǵydaı elordanyń belgili mádenı oshaqtarynda óner kórsetip, baq synaıdy.
Uıymdastyrý komıtetiniń sheshimimen daryndy jastar osy joly alty atalym boıynsha sheberlik baıqasady. Qatysýshylar «Klassıkalyq mýzyka», «Beıneleý óneri», «Halyq mýzykasy», «Sırk óneri», «Akterlik sheberlik» jáne «Úzdik ádebı shyǵarma» atalymdary boıynsha óner jarysyna túsedi. N.Muhambetalına osy jolǵy erekshelik retinde «Akterlik sheberlik» atalymynyń qosylǵanyn jáne «Úzdik ádebı shyǵarma» atalymynyń balalar ádebıetine arnalǵanyn atap ótti.
«Úzdik ádebı shyǵarma» atalymy boıynsha qazylar alqasynyń tóraǵasy aqyn Nesipbek Aıtuly balalarǵa arnalǵan 40-tan asa shyǵarma túskenin málimdedi. Onyń ishinde áńgimeler, ertegiler jáne shaǵyn áńgimeler de bar. «Biz jıyrma shyǵarmany tańdap aldyq. Sonyń altaýyna báıge beriledi. Berdibek Soqpaqbaev atyndaǵy jáne mádenıet basqarmasynyń da arnaıy ataýly báıgesi bar»-degen N.Aıtuly qazylar alqasynda Qýanysh Jıenbaı, Roza Muqanova, Mádı Aıymbetov jáne Tolymbek Ábdiraıym syndy tanymal prozaıkter bar ekenin habarlady.
Al, «Halyq mýzykasy» atalymy boıynsha qazylar alqasynyń atynan sóz alǵan Astana qalasy Memlekettik akademııalyq fılarmonııasynyń dırektory Sáken Ábdirahmanov qatysýshylarǵa bul joly qatań talaptar qoıylatynyn aıtty. Buryn dástúrli oryndaýshylar Jetisý, Arqa, Syr, Batys mektepteri boıynsha árqaısysy ózi kelgen óńirdiń án-termesin oryndaǵan bolsa, endi týra emtıhandaǵydaı qaǵaz sýyryp, sonda kórsetilgen án-termelerdi oryndamaq. Anyǵyraq aıtqanda, qatysýshylar burynǵydaı eki-úsh án-termege ǵana daıyndalyp kelmeýi kerek. Án-jyr ónerindegi barlyq mekteptiń ónerpazdarynyń shyǵarmashylyǵynan habardar bolýy shart.
Dál osyndaı qatań talap «Sırk óneri» atalymyna da qoıylyp otyr. Osy atalym boıynsha qazylar alqasynyń múshesi Vladıslav Vernadskıı 46 qatysýshynyń tańdap alynǵanyn aıtty. «Qatysýǵa ótinim bergender kóp boldy. Biz óte myqty nómirlerdi ǵana tańdap aldyq. Kásibı ónerpazdar da, áýesqoılar da bar. Biraq, talap bárine birdeı»-dedi ol.
Aıta keteıik, «Shabyt» shyǵarmashyl jastar festıvaliniń ashylýy búgin keshki 19.00-de elordadaǵy «Astana» konsert zalynda ótedi.
Aıgúl SEIIL,
«Egemen Qazaqstan»
Sýretterdi túsirgen Orynbaı BALMURAT
