Belgili qoǵam qaıratkerleri, ult zııalylary, ǵalym-túrkologtar men izdenýshiler qatysqan alqaly sharany Akademııa basshysy Darhan Qydyráli ashyp berdi.
Túrki jurtynyń tegeýrindi tulǵasy Á. Ibrahımniń týǵanyna 160 jyl tolýyna oraılastyryp otyrǵan sharada Japonııanyń belgili ǵalymy, bilikti túrkitanýshy Hasıo Komatsý túrik tilinde dáris oqydy.
Tara qalasynda týyp, orta mektepti aıaqtaǵannan keıin Qazaqstannyń medreselerinde, Mádına qalasynda bilim alǵan Ábdirashıt Ibrahım Túrkııada, Reseıde, Japonııada ıslam ilimin keńinen nasıhattaǵan. О́z ómirinde birneshe ret Japonııaǵa kelgen ǵalym 1938 jyly Kúnshyǵys eline qaıta oralyp, ómiriniń sońyna deıin sonda turǵan. Japon úkimetiniń resmı ıslam uıymynyń ókili jáne Tokıo meshitiniń ımamy bolyp qyzmet istegen. Ábdirashıt Ibrahımniń ómir jolyn keńinen aıtyp bergen, Akademııanyń shaqyrýymen Kúnshyǵys elinen arnaıy kelgen Komatsý myrza qatysýshylardy qyzyqtyrǵan suraqtarǵa da jaýap berdi.
Semınar sońynda Darhan Qydyráli japon ǵalymyna mazmundy baıandamasy úshin alǵys aıtyp, «Túrkologııany zertteýge qosqan úlesi úshin» Túrki Akademııasynyń Qurmet gramotasyn tabys etti.
«Túrki álemine eńbegi sińgen qaıratker tulǵalardyń ǵumyrynan taǵylym alý úshin bundaı semınarlardy júıeli túrde júrgizip otyramyz. Tarıhqa kóz salyp, túrki dúnıesiniń tulǵalaryn zerttegende biz baýyrlas halyqtardyń birligin kóremiz. Álemniń qaı tarabynda júrse de túrki jurtynyń kórkeıýin kóksegen tulǵalar taǵylymy búgin bizge – úlgi, ónege. Biz babalar salǵan dańǵyl joldy jalǵastyrýǵa mindettimiz», dedi Darhan Qydyráli.
Aıta ketý kerek, eldiń altyn dińgegi bolǵan jáne túrki dúnıesiniń maqtanyshtaryna aınalǵan zııalylardy dáripteý maqsatynda «Túrki áleminde tulǵalar taǵylymy» taqyrybynda semınarlar serııasyn Akademııa Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasy aıasynda júzege asyryp otyrmaq.
Baǵashar Tursynbaıuly,
"Egemen Qazaqstan"
Sýretterdi túsirgen Erlan Omarov
