«Bildeı sheneýniktiń munysy nesi? Álde ózine osylaı jarnama jasaǵysy kep júr me?» dep oılaryńyzdy san saqqa júgirtip otyrǵan bolarsyzdar. Joq, sheneýnik shahardyń qaq ortasynda erikkennen jumys istegen joq. Jazasyn ótedi.
Esterińizge sala keteıik, qazan aıynda qala ákimi orynbasarynyń óziniń qyzmettik kóligimen demalys kúnderi demalys bazalarynyń birinde júrgendigi anyqtalyp, bul másele oblystyq memlekettik qyzmet jáne sybaılas jemqorlyqqa qarsy departamentiniń ádep jónindegi keńesiniń otyrysynda qaralǵan bolatyn. Budan keıin О́skemen qalasynyń ákimi Qýat Tumabaev óziniń orynbasaryna qatań sógis berip, qyzmettik kóligin eki aıǵa deıin paıdalanýǵa tyıym salǵan-dy. О́ziniń shekten shyqqanyn túsingen sheneýnik «О́skemen Tártip» mekemesinde 20 saǵat qoǵamdyq jumys isteýge ynta bildiripti. Búgin sol ýádesinde turyp, tańǵy saǵat 8 ben 11 aralyǵynda tazalyq mekemesiniń jumysshylarymen birge respýblıka alańyndaǵy sýburqaqty qys maýsymyna daıyndaý jumystaryna járdemdesti.
Qala ákiminiń ekonomıkalyq máseleler jónindegi orynbasary Rasýl Manapovqa jumys barysynda ýaqytsha bastyq bolǵan «О́skemen Tártip» mekemesiniń aǵa masteri Maqsat Nurahmetov óz tájirıbesinde mundaı jaǵdaıǵa, ıaǵnı joǵary laýazymdaǵy sheneýniktiń qarapaıym jumysshylarmen teń dárejede eńbek etkenine alǵash ret kýá bolyp otyrǵanyn aıtady.
«Ádette biz qoǵamdyq jumysqa jiberilgen adamǵa keste ázirleımiz. Olar óz erkimen tórt nemese segiz saǵattyq jumysty tańdaıdy. Sosyn arnaıy kıim berip, jumys isteıtin jerin belgileımiz. R.Manapov tynym tappaı jaqsy jumys istedi, kóp kómegin tıgizdi. Taǵy da kómektesse, qarsy bolmas edik», - dep jymııady ol. Osylaısha «tek júrseń toq júresiń» degen naqyldy esten shyǵarǵan sheneýnik shege qaǵýǵa májbúr boldy.
Azamat QASYM,
«Egemen Qazaqtan»
О́SKEMEN
Sýretter О́skemen qalasy ákiminiń baspasóz qyzmetinen alyndy
