Qazaqstannyń oblystary men Almaty, Astana qalalarynan kelgen 600-ge jaqyn qatysýshylar jas erekshelikterine qaraı 2 topqa bólinip, 18 atalym boıynsha óner jáne mádenı-shyǵarmashylyq básekelestikke tústi. Pogodın atyndaǵy orys drama teatrynda uıymdastyrylǵan marapattaý saltanatynda oblys ákiminiń orynbasary Madııar Qojahmet jastar arasynda brendke aınalǵan tanymal is-sharanyń talantty ónerpazdardy anyqtaýdaǵy, ulttyq qundylyqtardy nasıhattaýdaǵy mańyzdylyǵyn atap ótti.
Ulttyq delfıı oıyndary komıtetiniń dırektory Quralaı Túspekova jeńimpazdar men júldegerlerdi jarııalady. Jalpykomandalyq esepte Soltústik Qazaqstan oblysy qorjynǵa 9 altyn, 11 kúmis, 6 qola salyp, birinshi orynǵa ıe boldy. Ekinshi, úshinshi oryndardy Astana qalasy men Aqmola oblysy bólisti. Jekelegen atalymdar boıynsha Dilnaz Tashmuhamed / «Halyqtyq ánder», Qyzylorda oblysy/, Bekzat Pirilepesov / «Dombyra», Ońtústik Qazaqstan oblysy/, Rystygúl Kósherova / «Beıneleý óneri», «Soltústik Qazaqstan oblysy»/, Mereı Yntymov / «Sán úlgisi», Astana/, taǵy basqalary top jardy. Jańadan engizilgen «Ishara tilinde án aıtý» jáne «Horeografııa» atalymdaryna 100-ge jýyq estý qabyleti kem balalar qatysyp, petropavldyq « Sensitive» bı ansambli, Elmıra Baltyqova /Almaty oblysy/, Erkeulan Qýandyq /Qyzylorda/ kórermenderdi óz ónerlerimen tánti etti. Sondaı-aq «Qolarbada bı bıleý» atalymynyń tusaýkeseri tamashalandy.
Qazaqstanda delfıı oıyndaryn damytý taqyrybyna arnalǵan kóshpeli sessııada sóılegen sózinde halyqaralyq delfıı komıtetiniń dırektory Vladımır Ponıavın Qyzyljar óńirinde shashalaryna shań juqtyrmaǵan óner, mádenıet-shyǵarmashylyq baıqaýlarynyń jeńimpazdary dúnıejúzilik dodaǵa joldama alǵandaryn málimdedi.
О́mir Esqalı,
«Egemen Qazaqstan».
Soltústik Qazaqstan oblysy
