– Premer-lıganyń chempıony sońǵy týrda anyqtaldy. Osynyń arqasynda ishki birinshilik tartysty aıaqtaldy. Biraq biz komandamyzǵa sendik, óz kúshimizge senim arttyq. Nátıjesinde laıyqty jeńisimizge jettik. Eýrokýboktyq oıyndardyń toptyq kezeńine shyǵý men el chempıony ataný osy maýsymdaǵy negizgi maqsatymyz bolǵan. Oıynshylardy, bapkerler alqasyn, klýb qyzmetkerlerin, fýtbol ortalyǵymyzdyń mamandaryn, klýbtyń Astanadaǵy, elimizdiń ózge óńirilerindegi, sondaı-aq dúnıe júzindegi barsha jankúıerlerin quttyqtaımyn!
– Saıan Jaqsygeldiuly, bul klýbtyń qatarynan tórtinshi chempıondyǵy. Bıylǵysy eń qıyny boldy dep esepteısiz be?
– Eń aldymen, bul este qalarlyq chempıondyq boldy. «Astana» qatarynan tórtinshi ret Qazaqstan chempıony atanyp, jańa rekord ornatty. Árıne, ońaı jolmen kelgen joq. Birinshiden, «Qaırat» ásirese maýsymnyń sońǵy bóligin joǵary deńgeıde ótkizdi. Bizden bar-joǵy bir upaıǵa qalyp, basty básekelesimiz atandy. Al ekinshiden, biz Eýropa lıgasynyń pleı-off kezeńine shyǵý úshin bar kúshimizdi salyp kelemiz. Eki jaqta jarys jolyna shyǵý komandaǵa ońaı emes. Sol sebepti oıynshylarymyzdyń mundaı qıyndyqqa shydap júrgenine alǵysymdy bildiremin.
– Bıyl «Astananyń» eýrokýbokta eki oıyny ǵana qaldy. Olardyń bireýinde jeńiske jetse kóktemgi kezeńge shyǵýǵa múmkindik bar. Múmkin deńgeıimizdi joǵary qoıyp toptan shyǵýdy maqsat etken jón shyǵar?
– Komandamyz bıylǵy eýrokýboktyq maýsymda kópshilikti tań qaldyryp keledi. Onyń ústine maýsym boıy ÝEFA-nyń salǵan tyıymy boıynsha tıisti transferler jasaı almaǵanymyzdy umytýǵa bolmaıdy. Osyndaı qıyndyqtarǵa qaramastan joǵary dárejege jetý ekiniń biriniń qolynan kele bermeıdi. Árıne, Qazaqstan fýtbolynyń tarıhynda alǵash ret eýrokýboktyq týrnırdiń toptyq kezeńinen ótken komanda atanýdy armandaımyz. Bul oıymyzdy júzege asyra alsaq, klýbymyzdyń qarqyndy damyp kele jatqanynyń belgisi bolar edi. Toptan shyǵý úshin aıanyp qalmaspyz. Al ary qaraı bul deńgeıge qanshalyqty laıyq ekenimizdi Jaratqan bir ózi anyqtaıdy.
Aıta keteıik, «Astana» búgin Premer-lıganyń sońǵy týrynda Oraldyń «Aqjaıyǵyn» óz alańynda 2:0 esebimen utyp, tórtinshi jyl qatarynan el chempıony ataǵyna qol jetkizdi.
Aıan ÁBDÝÁLI,
«Egemen Qazaqstan»
