Alqaly jıynǵa Saıası keńes músheleri – Úkimettiń, Parlamenttiń, Prezıdent Ákimshiliginiń basshylyǵy, Memlekettik hatshy, «Nur Otan» partııasynyń Májilistegi fraksııasynyń depýtattary, ortalyq jáne jergilikti memlekettik organdardyń basshylary qatysty. Onda elimizdiń saıası, ekonomıkalyq jáne rýhanı jańǵyrý úderisteri aıasynda partııanyń atqarǵan jumysy qorytyndylanyp, onyń qyzmetin ári qaraı jetildirý máseleleri qaraldy.
«Búgin biz «Nur Otan» partııasyn jańǵyrtýǵa qatysty mańyzdy máseleni talqylaımyz. Bıyl «Nur Otan» partııasynyń qurylǵanyna 18 jyl bolady. Bul adam ómiriniń ólshemindegi alǵashqy kámelet jasy bolyp sanalatynyn bilesizder. Osy ýaqyttyń ishinde partııamyz shynyǵyp, shyńdalyp, elimizdegi eń úlken saıası kúshke aınalǵany belgili. Qurylǵan kúnnen bastap barlyq eldik isterdiń basy-qasynda bolyp kele jatyr», dedi keńeıtilgen otyrystyń ashylýynda Qazaqstan Prezıdenti Nursultan Nazarbaev. Sonymen qatar Memleket basshysy halqymyzdyń bereke-birliginiń artýyna, elimizdiń saıası turaqtylyǵynyń nyǵaıyp, ekonomıkalyq reformalardy tabysty iske asyrýǵa da «Nur Otan» partııasy belsendi atsalysyp kele jatqanyn basa aıtty.
«Halyqpen tikeleı jumys istep, kezek kúttirmeı sheshilýge tıisti máselelerdi únemi nazarda ustap, naǵyz eldik partııa atandy. Oǵan ótken saılaýlardaǵy eldiń zor senimi aıqyn dálel. Sol saılaýlarǵa belsendi qatysqan bizdiń partııa músheleriniń atqarǵan jumysy, jergilikti uıymdardyń istegen sharýasy nátıjesinde halyqtyń júrgizip otyrǵan saıasatymyzǵa senip, biryńǵaı daýys bergenin kórip otyrmyz. Partııa bolashaqta da elmen etene bolyp, halyqqa qaltqysyz qyzmet etýdi jalǵastyra beredi dep senemin», dedi Prezıdent.
Elbasy partııa aldynda áli talaı sharýa bar ekendigin de atap ótti. «Qajetti baǵdarlamanyń barlyǵy qabyldandy, ony ózderińiz de bilesizder. Degenmen qazirgi jaǵdaıda, dúnıedegi ǵylymı-tehnıkalyq damýdyń jańa salasyna búkil álem túsip otyrǵan kezde bizdiń alǵa qoıǵan maqsattarymyz az emes. Sondyqtan osynyń barlyǵyna partııa basshy bolyp, jergilikti jerlerde saıasatty túsindirýi qajet», dedi N.Nazarbaev. Qazaqstan Prezıdenti partııanyń elimizdegi strategııalyq reformalardy iske asyrý jolyndaǵy jetistikteri men atqarǵan jumysyna toqtalyp, kúrdeli ári júıeli sheshimder qabyldaý qajettigi jáne olardy dáıekti iske asyrýdyń mańyzdylyǵy jóninde aıtty.
«Jańǵyrý eshqashan ońaı júzege asa qoımaıdy. Ol kedergige de tap bolýy múmkin. Osy rette, «Nur Otan» partııasy, eń aldymen, jańǵyrý baǵytyna saıası qoldaý kórsetý tetikterin qalyptastyrýǵa tıis. Bılik tarmaqtary arasyndaǵy birqatar ókilettikterdi qaıta bólýge qatysty konstıtýsııalyq reforma máselelerine keletin bolsaq, bul – elimizdiń saıası júıesin demokratııalandyrý maqsatynda jasalǵan mańyzdy qadam», dedi Nursultan Nazarbaev.
Elbasy «Rýhanı jańǵyrý» baǵdarlamasyn «Nur Otan» partııasynyń qazirgi ıdeologııalyq jumysynyń platformasy dep atady. «Partııa qyzmetin jańǵyrtý jóninde aıtqan kezde, biz jańǵyrýdyń 2017 jyly jarııalanǵan úsh baǵdarlamasyn iske asyrý barysynda «Nur Otan» partııasynyń rólin aıqyn ári anyq túsinýimiz kerek. Osy baǵdarlamalardy júzege asyrýǵa laıyqty atsalysý úshin partııa óz jumysyn ózgertýdiń naqty joldaryn tabýǵa tıis», dedi Memleket basshysy.
Qazaqstan Prezıdenti partııa qyzmetin odan ári jetildirý jóninde naqty usynystar ázirleýdiń mańyzdylyǵyna nazar aýdaryp, partııa Tóraǵasynyń birinshi orynbasary Muhtar Qul-Muhammedtiń esebin tyńdady.
«Nur Otan» partııasy 18 jyl buryn óz jumysyn bastaǵanda ne turaqty jumys isteıtin qurylymdary, ne ózine tıesili ǵımaraty, ne qajetti qarajaty joq boldy. Osy jyldar ishinde Sizdiń parasatty tóraǵalyǵyńyzben órkendep, mıllıonnan astam múshesi bar, 16 oblystyq jáne Astana men Almaty qalalyq, 227 aýdandyq ári terrıtorııalyq, 5824 bastaýysh uıymdardan turatyn elimizdiń eń úlken saıası partııasyna aınaldy. Siz usynǵan Ulttyq strategııaǵa saı álemdegi eń úzdik partııalar jınaqtaǵan tájirıbelerdi eskere otyryp, «Nur Otan» partııasy búginde ınstıtýttyq jaǵynan ábden tolysty dep nyq senimmen aıta alamyz.
Sondyqtan qazirgi kezeńde partııa qataryna qabyldaý talaby kúsheıtilip, ózine de, partııaǵa da abyroı ákeletin, elge sózi ótetin, jaýapkershilik júgin sezine biletin bedeldi azamattar ǵana qabyldanýda», dedi M. Qul-Muhammed Elbasyna qarata aıtqan sózinde. Osy oraıda ol ǵasyrlar júgin arqalaǵan el táýelsizdiginiń ár jyly erekshe tarıhı oqıǵalarǵa toly bolǵanyn, úsh birdeı jańǵyrýǵa, konstıtýsııalyq reformaǵa, ekonomıkadaǵy úshinshi jańǵyrýǵa, ult rýhanııatyn jańa bıikke kótergen «Rýhanı jańǵyrýǵa» jarqyn jol ashylǵanyn atap ótti.
«Osy úsh jańǵyrý jarııalanǵan kúnnen bastap, nurotandyqtar partııa Tóraǵasynyń tarıhı bastamalaryn ár qazaqstandyqtyń júregine jetkizýge bar kúsh-jigerin jumsap keledi. Partııanyń kúndelikti jumysynda respýblıka Úkimetimen birlese qabyldanyp, 2021 jylǵa deıingi merzimdegi Saılaýaldy baǵdarlamasyn oryndaý birinshi kezekte tur. Partııanyń respýblıkalyq jelilik kestesine saı, jyl basynan beri 5 mıllıonnan astam adamdy qamtyǵan 85 myńǵa jýyq is-sharanyń nátıjesinde baǵdarlamada belgilengen mejelik kórsetkishterdiń 96 paıyzy búginde oryndaldy», dep atap ótti Muhtar Qul-Muhammed.
Qazirgi kúni Parlament Májilisindegi partııanyń fraksııalyq qyzmeti jetildirildi jáne partııalyq tártip nyǵaıtyldy. Bıylǵy jyly depýtattar – partııa fraksııasynyń músheleri Májiliske kelip túsken 148 zań jobasynyń 131-in qaraý jónindegi jumys toptaryn basqarǵan. 8 zań jobasyna bastamashylyq jasaldy, olardyń tórteýi qabyldandy. Partııanyń Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýyn nasıhattaý boıynsha jumysyna barlyq partııalyq qurylymdar – bastaýysh partııa uıymdary, fraksııa depýtattary, konsýltatıvti-keńestik organdar men dıalog alańdary, ortalyqtaǵy ári jergilikti qoǵamdyq qabyldaý bólmeleri jumyldyryldy.
Aqparattyq ilgeriletý men Joldaýdyń basty basymdyqtaryn iske asyrý partııalyq jobalardy júzege asyrý negizinde uıymdastyryldy. Jalpy alǵanda, 4 mln adamdy qamtyǵan 46,9 myń is-shara ótkizilgen. Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn aqparattyq ilgeriletý maqsatynda partııa barlyq resýrstar men aktıvterdi iske qosty, jastardy, sarapshylar men zııaly qaýymdy tarta otyryp, ártúrli dıalog alańdarynda jumys júrgizedi. Búginde «Nur Otan» partııasynyń qatarynda 190 myń (29 jasqa deıingi) jas qazaqstandyq bar. «Jas Otan» qyzmeti 16 aımaqtyq jáne 208 qalalyq ári aýdandyq fılıal, kásiporyndardaǵy 230 bólimshe men JOO-daǵy 96 bólimshe arqyly júzege asyrylady.
Dınara BITIK,
«Egemen Qazaqstan»
Sýretter Prezıdenttiń baspasóz
qyzmetinen alyndy
