Bókeı ordasy aýdanynyń ortalyǵy – Saıqyn aýylynyń sý qubyry nysany 2016 jylǵy 24 qarashada bastalǵan bolatyn. Qurylystyń jalpy quny 372 mln 381 myń 240 teńge turady. 2016 jyly nysan qurylysyna – 37, bıyl 147 mln teńge bólindi. Qazirgi kezde qurylys-montaj jumystary júrgizilýde. Nysan tolyq aıaqtalyp, paıdalanýǵa berilýi úshin áli 88,5 mln teńgedeı qarajat kerek. Tartylatyn sý qubyrynyń uzyndyǵy 47 km 840 metrdi quraıdy. Qazirgi kezde 40 km sý qubyry úı aýlasyna deıin jetkizildi. Búginge deıin Saıqyn aýylyndaǵy 937 aýlanyń 530-yna sý qubyry tartylǵan.
Aýdanǵa qarasty Bórli aýylynda sý qubyry qurylysy nysany 2017 jyldyń 24 naýryzynda bastalǵan edi. Qurylysshylar jedel qımyldap, 6,2 aıdyń ishinde qurylys-montaj jumystaryn támamdap, qazan aıynda sý qubyryn iske qosyp úlgerdi. Bul nysannyń jalpy quny 215 mln teńgege taıaý qarjyny qurady. Onyń 172 mln teńgedeıi respýblıkalyq, 42 mln 702 myń teńgesi oblystyq bıýdjet esebinen bólindi. Joba boıynsha 22,8 km sý qubyry tolyǵymen tartylyp, turǵyn úılerge jetkizilgen. Shyny kerek, oblys ortalyǵynan da, bir birinen de shalǵaı jatqan bul eldi mekenderge sý, gaz sekildi ıgilikterdi jetkizý ońaı emes. Máselen, Saıqyn aýyly Oral qalasynan 600 km bolsa, Bórli men Saıqynnyń arasy 130 shaqyrym eken.
Bıyl taza sýǵa qol jetkizip otyrǵan aýyldyń biri – Kókterek. Bul nysan qurylysy da bıyl kóktemde, 24 naýryzda bastalǵan bolatyn. Búginde qurylys-montajdaý jumystary júrgizilýde. Qurylys merzimin 7,4 aıda aıaqtaý josparlanǵan. Osy maqsatqa bólingen 185 mln 274 myń teńgeniń basym bóligi, ıaǵnı 148 mln 345 myń teńgesi – respýblıkalyq, 37 mln 929 myńy oblystyq bıýdjet qarajaty esebinen bólindi. Nysan qarasha aıynda paıdalanýǵa beriledi dep josparlanǵan. Qazirdiń ózinde 20,464 km sý qubyry tolyq tartylyp tur. Qurylys bitken soń Kókterek jáne Jambyl eldi mekenderine sý qubyry qosylady.
– Aýdanymyzdyń 7 eldi mekenine – Shońaı, Jármeńke, Taıǵara, Ájen, Qarasý, Úshterek jáne Keńoı aýyldaryna sý qubyrynyń qurylys nysandary boıynsha ınjenerlik-geodezııalyq, ınjenerlik-geologııalyq izdeý jumystary júrgizilýde. Jobalaý-smetalyq qujattardy daıyndaý jumysynyń jalpy quny 44 mln teńgege jýyq. Buıyrsa, atalǵan jeti aýyl da kóp keshikpeı ortalyqtandyrylǵan taza sýmen qamtylatyn bolady, – deıdi Bókeı ordasy ákimi Nurlan Rahymjanov.
Batys Qazaqstan oblysynyń ákimi Altaı Kólginovtiń aıtýynsha, 2018 jyly oblysta taǵy 50 aýylǵa sý tartý jumystary júrgizilmek. О́ńir turǵyndary osy kezge deıin elimiz boıynsha taza aýyz sýmen nashar qamtylǵan aımaq sanalatyn. Bıylǵy keshendi jumystar nátıjesinde bir jyl ishinde 55 aýylǵa taza sý qubyry tartylyp, oblys turǵyndarynyń taza sýmen qamtylý koeffısıenti 36%-dan 44%-ǵa jetip otyr.
Qazbek QUTTYMURATULY,
«Egemen Qazaqstan»
Batys Qazaqstan oblysy
Sýretti túsirgen
Aıbatyr NURASh
