Bes kúnge jalǵasatyn jıynda qatysýshylar kóshbasshylyq negizderi, onyń ishinde personaldy kóshbasshylyq pen komandaǵa uıytqy bolý, uıymdy transformasııalaý, ishki jáne uıymaralyq kommýnıkasııa máseleleri qarastyrylýda. Jetekshilerdi oqytýdyń maqsaty – «A» korpýsyndaǵy memlekettik qyzmetkerlerdiń áleýetin qamtamasyz etý jáne damytý.
Semınardy Qazaqstan Prezıdenti Ákimshiligi Basshysynyń orynbasary Ońdasyn Orazalın, memlekettik qyzmet salasyndaǵy Astana óńirlik haby Basqarýshy komıtetiniń tóraǵasy Álıhan Baımenov jáne Nazarbaev Ýnıversıtettiń prezıdenti Shıgeo Katsý quttyqtaý sózderimen ashty.
Álıhan Baımenov óziniń sózinde Qazaqstannyń memlekettik qyzmetin jetildirýde «A» korpýsynyń, kásibı memlekettik qyzmettegi eń joǵary laýazymdar – jaýapty hatshylar men apparat jetekshileriniń orny erekshe ekenin atap ótti. «Memlekettik organdardyń strategııalyq josparlarǵa saı yrǵaqty jumysyn qamtamasyz etip, kadrlar qyzmetin úılestiretin jaýapty hatshylar men apparat jetekshileriniń kóshbasshylyq qasıetteri arqasynda memlekettik organdarda mamandardyń áleýetin el ıgiligine jumsaýǵa múmkindik beretin tıisti ahýal qalyptasady», dedi. Sondyqtan ol jaýapty hatshylar men apparat jetekshileriniń memlekettik organdardaǵy menedjment pen kóshbasshylyq boıynsha ozyq ıdeıalardy meńgerýi mańyzdy ekenin sóz etti.
Semınar jumysyna «A» korpýsynyń 35 memlekettik qyzmetkeri – mınıstrlikterdiń jaýapty hatshylary men oblys ákimdikteriniń apparat jetekshileri qatysýda. Dárister kezinde qatysýshylar komandanyń tıimdiligine áser etetin faktorlardy, menedjerler men kóshbasshylardyń róli men mindetterin qarastyryp, taldaıtyn bolady. Olar basqarýdaǵy kúrdeli mindetterdi oryndaý tásilderin meńgerip, jańa qundylyqtar men mádenıetterge beıimdelý arqyly jahandyq zamanaýı synaqtarǵa tótep berý joldarymen tanysady.
«Egemen-aqparat»
