Onyń quramynda Investısııalar jáne damý vıse-mınıstri Roman Sklıar, Ulttyq ekonomıka vıse-mınıstri Aıbatyr Jumaǵulov, «Qazaqstan temir joly» UK» AQ prezıdenti Qanat Alpysbaev, «QazAvtoJol» UK» AQ basqarma tóraǵasy Ermek Qızatov, «Báıterek» UBH» AQ basqarma tóraǵasynyń orynbasary Ánýar Omarhodjaev bar.
Sapar barysynda A.Mamın Shymkenttegi halyqaralyq áýejaıdyń jumysyn kórip, onda «Shymkent áýejaıy» AQ basqarma tóraǵasynyń orynbasary Sáken Mamyrbekovtiń baıandamasyn tyńdady. Sonymen qatar Ońtústik Qazaqstan oblysynyń ákimi Janseıit Túımebaevtyń qatysýymen ótken áýejaıdy qaıta qurý boıynsha jıynǵa qatysty.
Budan soń delegasııa músheleri «Ońtústik» kólik-logıstıkalyq ortalyǵynyń jumysymen tanysty. Qazaqstannyń Eýrazııanyń kólik-logıstıkalyq habyna aınalýy boıynsha memlekettik «Nurly jol» baǵdarlamasy aıasynda qurylǵan «Ońtústik» kólik-logıstıkalyq ortalyqtyń aýmaǵy 92 gektardy quraıdy. Qazirgi tańda atalǵan aımaqta jekemenshik 8 ınvestısııalyq joba júzege asyrylyp jatyr.
Logıstıkalyq ortalyqtan keıin A.Mamın Ordabasy aýdanynda ornalasqan Indýstrııalandyrý kartasyna engen «Agro V» kirpish zaýytyn aralap kórdi. Joba quny 527 mln teńgeni quraıtyn zaýyt jylyna 25 mıllıon kirpish shyǵarady.
Sapar barysynda Premer-Mınıstrdiń birinshi orynbasary Shymkent qalasyndaǵy «Nurly jer» baǵdarlamasy aıasynda salynyp jatqan kóp qabatty turǵyn úılerdiń qurylys jumysymen tanysty.
Turǵyn úıge muqtajdyq jaǵynan Ońtústik jurty Astanadan keıin ekinshi orynda delinedi. Resmı málimetke súıensek, Shymkenttegi baspana kezeginde turǵandar sany 54 myńnan asady. Sondyqtan bul másele kúrmeýli kúıinde tur.
Osynda ótken shaǵyn jıynda oblys ákimi J.Túımebaev bıyl qarjylandyrýdyń barlyq kózderi arqyly 279 turǵyn úı qurylysy júrgizilip jatqanyn, búginde 461,5 myń sharshy metr turǵyn úı paıdalanýǵa berilgenin aıtty.
«Nurly jer» baǵdarlamasynyń oryndalý barysyn baıandaǵan oblys ákiminiń birinshi orynbasary Darhan Satybaldy kredıttik turǵyn úı satyp alýǵa múmkindigi joq 35 myń otbasyn arendalyq baspanamen qamtý úshin oblys kóleminde 1 mıllıon 700 myń sharshy metrden astam turǵyn úı qoryn qurý qajettigin aıtty.
Budan soń A.Mamın bastaǵan delegasııa Shymkent – Tashkent baǵytyndaǵy «Batys Eýropa – Batys Qytaı» halyqaralyq dáliziniń qurylys jumystarymen tanysty. Munda 2017 jyly uzyndyǵy 99 shaqyrymdy quraıtyn jol paıdalanýǵa beriledi. Búginde jumystar qyzý júrip jatyr.
Sapar barysynda Premer-Mınıstrdiń birinshi orynbasary Ońtústikte atqarylyp jatqan jumystarǵa jaqsy baǵa berip, Elbasy tapsyrmalarynyń ýaqytynda oryndalýyn oblys ákimdigine mindettedi.
Baqtııar TAIJAN,
«Egemen Qazaqstan»
Ońtústik Qazaqstan oblysy
