Sheshim boıynsha olardyń bári memleketten shyǵýyna tyıym salynǵan, sondaı-aq, meken-jaıy týraly habardar etýi tıis. Ispanııa soty olardy tutqynǵa alý týraly order bergen bolatyn. О́z kezeginde Katalonııanyń burynǵy úkimet músheleri jeksenbi kúni jergilikti ýaqyt boıynsha 10:00-de Belgııa federaldyq polısııasyna qorǵaýshylarymen birge óz erikterimen keldi. Tyńdalym on saǵatqa sozyldy.
Madrıd Katalonııaǵa konstıtýsııanyń 155-babyn qoldanyp tikeleı bılik júrgizý týraly sheshim qabyldaǵan. Osydan keıin Pýchdemon men ózge tórt mınıstr Belgııaǵa bas saýǵalap bardy. Brıýsselde ótkizgen baspasóz jıynynda ol ádil sot júıesine kepildik bermeıinshe Ispanııaǵa oralmaıtynyn málimdedi.
Ispanııada olarǵa búlik jasady, zańsyz qadamdarǵa bardy jáne memleket qarajatyn orynsyz jumsady degen aıyp taǵyldy. Dáleldengen jaǵdaıda 30 jylǵa bas bostandyqtarynan aıyrylýy múmkin. Katalonııanyń eks-músheleri 15 kún ishinde sot aldyna barady dep kútilip otyr. Al Belgııa 60 kún ishinde kúdiktilerdi Ispanııaǵa qaıtarýy tıis.
«Izdeýde júrgender Brıýssel prokýratýrasyna bergen ýaqytsha bosatý týraly ótinishi qanaǵattandyryldy», – delingen prokýratýra habarlamasynda.
Katalonııanyń eýropalyq demokratııalyq partııasy (PDeCAT) osy tusta mynadaı málimdeme jasady: «Olardyń bul áreketi qylmystyq qýdalaýdan qashpaıtynyn, qaıta ádil prosess barysynda ózderin qorǵaǵysy keletindiginiń belgisi. Bul Ispanııaǵa qaraǵanda Belgııada ótýi ábden múmkin».
1 qazan kúni ótken referendým negizinde Katalonııa táýelsizdigin jarııalaǵan bolatyn. Alaıda ony Madrıd tarapy moıyndamady.
Budan bólek, táýelsizdik alý referendýmyn eshbir memleket moıyndamady. Al Ispanııa Katalonııanyń birjaqty sheshiminen keıin konstıtýsııanyń 155-babyn júzege asyrdy. Osy zańnyń negizinde tikeleı bılik júrgizip, óńir bıligin taratyp jiberdi. Pýchdemon qyzmetinen bosatyldy. Al jańa saılaý 21 jeltoqsanǵa josparlanyp otyr.
Aıan ÁBDÝÁLI,
«Egemen Qazaqstan»
