«Delta Bank» AQ-ty lısenzııadan aıyrý týraly sheshim kelesi faktorlardyń bolýyna negizdelgen. Birinshi kezekte, zaemshylardy nesıeleýge múmkindik bergen kredıttik táýekelderdi basqarý boıynsha ishki prosedýralardyń jetkiliksizdigi, turaqsyz qarjylyq jaı-kúıdiń bolýy, sonymen qatar sapaly kepilmen qamtamasyz etilmegen zaımdardy berý kredıt boıynsha óteý merzimi ótip ketken bereshektiń aıtarlyqtaı ósimine túrtki boldy. Máselen, 2017 jyldyń 1 qazanynda óteý merzimi ótip ketken zaımdar banktiń uaryz qorjynyń 99,7 paıyzyn (314,8 mlrd teńge) qurady», - dedi ol.
Onyń aıtýynsha, ekinshiden, lısenzııadan aıyrý týraly sheshim qabyldanǵan kezde banktiń korrespondenttik esepshottarynda jáne kassasynda qalǵan aqsha 215,1 mln teńgeni quraǵan. Al dál osy kezdegi depozıtorlar men kredıorlar aldyndaǵy óteý merzimi ótip ketken mindetteme somasy shamamen 79,8 mlrd teńge bolǵan. Osyǵan baılanysty Ulttyq bank uzaq ýaqyttan beri «Delta Bank» AQ menedjerlerimen jáne aksıonerlerimen ashyq suhbat júrgizip, bankke qarjylyq qoldaý qajet ekendigin belgilep bergen. Alaıda banktiń iri aksıoneri tarapynan bankke qarjylaı qoldaý kórsetilmegen.
«Bank sektoryndaǵy jıyntyq aktıvter men mindettemelerdegi bul banktiń aktıvteri men mindettemeleriniń úlesi tómen ekendigine baılanysty banktiń lısenzııadan aıyrylýy ózge qarjylyq ınstıtýttarǵa qandaı da bir táýekel ákelmeıtindigin atap ótemiz. QR Ulttyq banki tóraǵasynyń 2017 jylǵy 2 qarashadaǵy №402 buıryǵymen ýaqytsha ákimshilik taǵaıyndalyp, oǵan banktiń barlyq basqarý organdarynyń ókilettigi berildi. Ýaqytsha ákimshilik sotpen taratý komıssııasy taǵaıyndalǵanǵa deıin jumys isteıtin bolady», - dedi Oleg Smolıakov.
UB tóraǵasy orynbasarynyń sózine qaraǵanda, 3 qarashadan bastap klıentterdiń jáne banktiń banktik esepshottary boıynsha barlyq operasııalar toqtatyldy. Tek ókiletti organdardyń normatıvtik-quqyqtyq aktilerinde kózdelgen shyǵystarmen baılanysty bankke túsetin aqshalardy aýdarý ǵana júrgiziledi. «QR Ulttyq banki belgilengen zańnamalyq tártippen sotqa bank qyzmetin májbúrli túrde toqtatý týraly aryz berdi», - dedi ol.
Buǵan qosa, ol atalǵan bank jeke tulǵalardyń depozıtterin mindetti kepildendirý júıesine qatysýy ekendigin eskertip ótedi. Onyń dereginshe, teńge túrindegi depozıt boıynsha kepil berilgen soma 10 mln teńge deıingi, al shetel valıýtasynda 5 mln teńgege deıingi somany quraıdy. Osyǵan baılanysty depozıtorlarǵa belgilengen tártippen kepil berilgen soma óteledi.
