Qamaýǵa alynǵandar qatarynda Saýd Arabııasynyń mıllıarderi Alvaled ben Talal da bar. Ol 10 mlrd dollar turatyn Kingdom Holding ınvestısııalyq kompanııasynyń ıesi, álemdegi eń baı adamdardyń biri. Atalǵan kompanııa Twitter, Citigroup, Lyft, Four Seasons Hotels jáne Apple sekildi kompanııalarǵa ınvestısııa quıady. CNN-niń habarlaýynsha, sybaılas jemqorlyqqa aıyptalǵannan keıin kompanııa quny birden 750 mln dollarǵa tómendep ketken.
Saýd Arabııasynyń resmı agenttigi Al-Arabııanyń habarlaýynsha, jańadan qurylǵan komıtet sybaılas jemqorlyqqa qatysy bar degen kez kelgen adamdy qamaýǵa alyp, tergep, shetelge shyǵýǵa tyıym sala alady. Al baılanys mınıstrligi sybaılas jemqorlyqqa qarsy komıtetti Koroldiktiń damýyna kedergi keltiretin problemalardy sheshýge arnalǵan reforma baǵdarlamalarynyń biri retinde atady. BAQ málimetterine sensek, Ritz Carlton Riyadh bes juldyzdy qonaq úıinde 11 hanzadadan basqa taǵy 38 sheneýnik pen kásipkerden jaýap alynyp jatyr.
Mohammed ıbn Salman bıliktiń jańǵyrýyn qolǵa aldy
Sybaılas jemqorlyqqa qarsy komıtetti ashqan murager hanzada Mohammed ıbn Salman 2015 jyly qorǵanys salasynda basshylyq qyzmette bolsa, osy jyldyń basynda ishki qaýipsizdik mınıstrligin basqaratyn boldy. Ol Saýd Arabııasynyń ekonomıkasynyń munaıǵa táýeldiligin azaıtý boıynsha damý josparyn engizgen edi.
Qazan aıynda Mohammed ıbn Salman Er-Rıaıadta ótken ekonomıkalyq konferesnııada koroldiktiń barlyq dinge syılastyqpen qarap, ekstremızm qaldyǵynan qutylý kerektigin aıtqan bolatyn. "Biz barlyq dinge, dástúrge, álemniń barlyq adamdaryna syılastyqpen qaraıtyn burynǵy qalpymyzǵa kelý kerekpiz. О́mirimizdiń kelesi 30 jylyn destrýktıvti ıdeıalarǵa jumsamaýymyz kerek", degen bolatyn ol. Hanzada qyrkúıekte áıelderge kólik júrgizýge, sporttyq jarystardy stadıonnan tamashalaýǵa ruqsat bergen edi.
Halyqaralyq sarapshylardyń aıtýynsha, hanzadanyń jańa bastamalary men reformalaryna qarsy shyǵýshylar da, qoldaýshylar da bar. Al senbi kúni 11 hanzada qamaýǵa alynǵannan keıin keıbiri muny "tazalaý jumystary" dese, keıbiri bıliktiń oıyny dep baǵalady.
Elde bılik úshin kúres júrip jatyr - New York Times
New York Times Saýd Arabııasy hanzadasynyń bastamalary týraly kólemdi maqala jarııalady. Onda "Memlekettiń munaıǵa táýeldiligin azaıtý ıdeıasy da, jańa damý jospary da keıbireýlerdi qýantsa, basqalary tájirıbesi az ári ózi jas hanzadanyń shala áreketi dep baǵalady. Sonymen qatar jas hanzada bir otbasynan shyqqan, ózinen úlken aǵaıyndylardyń da aldyn orap ketti", dep jazdy basylym.
New York Times koroldik otbasynda bılik úshin kúrestiń birshama ýaqyt buryn bastalyp ketkenin aıtty. Maqalada aıtylǵandaı, qamaýǵa alynǵan hanzadalar bılik úshin kúres júrgize bastaǵan. Al jas hanzada Mohammed ıbn Salmannyń áreketi konservatıvti toptardyń ashýyn týǵyzyp, jaǵdaıdy ushyqtyrýy múmkin.
Daıyndaǵan Gúlnur Qýanyshbekqyzy,
"Egemen Qazaqstan"
